Børsdagen: Ny botnnotering for Atlantic Sapphire

I førre veke fekk det landbaserte oppdrettselskapet Atlantic Sapphire inn 587 millionar kroner i ei kapitalutviding til fem kroner aksjen.

På det lågaste i dag vart aksjane i Atlantic Sapphire handla til 5,13 kroner aksjen, og ved børsslutt var kursen 5,34 kroner. Det ned 3,44 prosent sidan fredag i førre veke og er den lågaste kursen aksjen har hatt sidan børsnoteringa i 2018.

Kapitalutvidinga i førre veke vart gjort gjennom ein såkalla retta emisjon, der typisk berre ein fåtal større investorar får vere med - som ofte er dei aksjonærane som er størst frå før.

Resten av aksjonærane får sjansen til å bli med i ein såkalla reparasjonsemisjon - til same kurs. På den måten kan dei oppretthalde sin eigarandel, eller i det minste delvis oppretthalde kor stor andel dei skal eige i selskapet.

Blir reparasjonsemisjonen fullteikna får Atlantic Sapphire ytterlegare 100 millionar kroner i ny eigenkaptial.

Men om kursen fell under emisjonskursen, som i dette tilfellet er fem kroner aksjen, er det ikkje noko poeng i å delta i reparasjonsemisjonen.

Då er det billegare å kjøpe aksjar på børsen. Konsekvens då er fort at reparasjonsemisjonen blir avlyst og selskapet ikkje blir tilført dei pengane reparasjonsemisjonen skulle gi.