Børsdagen: Nytt kraftig fall

Sjå børstabell for Nordvestlandet under

Oslo Børs starta veka med eit nytt fall måndag, som var endå kraftigare enn fredag.

Hovudindeksen var ned kring fire prosent kort tid etter handelen starta. Litt etter klokka 11 var fallet redusert til kring 2,8 prosent - men dagen enda med 3,36 prosent i minus til 1361,58 poeng.

Også amerikanske aksjemarknader stupte då dei opna måndag ettermiddag norsk tid. Dow Jones-indeksen krympa med 2,8 prosent, medan Nasdaq fall 6,2 prosent og S&P 500-indeksen var ned 4,1 prosent i opningsminutta.

Nedgangen skjer etter eit kraftig børsfall i Asia, der Nikkei 225-indeksen i Tokyo stupte med 12,4 prosent - det verste børsfallet sidan 1987.

Allereie måndag ettermiddag kjem forventningane til innkjøpssjefen i amerikansk tenestesektor. Viss dei blir tolka negativt, vil dei truleg forsterke den negative stemninga som rår for tida.

Samtlege aksjar for dei børsnoterte selskapa frå Nordvestlandet fall frå start måndag.

Golden Energy Offshore og Havila Shipping fall mest av dei lokale selskapa i starten. Førstnemnte henta seg litt inn att eit par timer ut i handelen, medan pila peika vidare ned for Havila-reiarlaget.

Atlantic Sapphire slutta likevel dagen som børstaparen frå regionen med eit fall på 9,65 prosent til 5,15 kroner.

Då handelen slutta var det berre Salmon Evolution og Romsdal Sparebank frå regionen som hadde eit liten oppgang i løpet av dagen.

Kongsberg Gruppen var mellom tungvektarane på Oslo børs som fekk ein tung start, med eit fall på 3,95 prosent tidleg om føremiddagen.

Børsuroen som starta før helga etter skuffande jobbtal i USA, har auka frykten for resesjon. Børsar over store delar av verda fall i etterkant. Det same gjorde oljeprisen som ved stengetid måndag låg på 76,20 dollar fatet.

Børstabell for Nordvestlandet: