Børsdagen: Opptur tysdag, nedtur onsdag

Dei stor svingingane for offshoreaksjane held fram. Tysdag var offshoreaksjane blant vinnarane, onsdag blant taparane.

Offshorereiarlaget DOF i Austevoll kom omsider med ei avklaring om gjeldsforhandlingane i selskapet etter stadig nye tidsfristar for å finne ei løysing.

DOF får gjort om 5,7 milliardar kroner i gjeld til aksjar, og dagens aksjonærar med Møgster-familien i spissen blir sittande igjen som småaksjonærar i selskapet.

Les børsmelding her

Konsekvensen for av refinansieringsframlegget er tydlegvis større enn dagens aksjonærar hadde sett for seg, for aksjen stupte 44,1 prosent i dag.

Eit regionalt selskap som ser ut til å få refinansiering på plass er Golden Energy Offshore, som no har tatt eit nytt steg mot å klare å overta eigarskapen i offshorefartøya Energy Empress og Energy Duchess. I dag leiger reiarlaget frå det kinesiske verftet ROC.

Golden Energy Offshore Services-aksjen fall 2,08 prosent.

Mobiltelekommunikasjonsselskapet Nortel melde om ei større kontrakt med statleg kunde i dag. Det vart godt mottatt og aksjen steig 2,98 prosent sidan i går, til 17,30 kroner per aksje.

Nortel gjekk på børs i november 2020. Første børsdag var kursen 22 kroner aksjen. Den førebelse toppen for Nortel-aksjen kom i slutten av september 2021, med 28,30 kroner aksjen.