Børsdagen: Pasient løfta aksjekursen

Arctic Bioscience i Ørsta utviklar eit legemiddel mot hudsjukdomen psoriasis, basert på silderogn.

I januar melde selskapet at det hadde fått startsignal frå britiske styresmakter for å sette i gang ein større internasjonal medisinsk studie.

I dag melde selskapet at den første pasienten i studien er rekruttert. I alt 519 personar frå fem land - Storbritannia, Tyskland, Polen, Finland og Noreg - skal vere med i studien. Innan seks månader skal siste deltakarane vere rekruttert, og omlag eitt år frå no vil dei første resultata av studien vere klare.

Les børsmelding her

I aksjemarknaden vart børsmeldinga, som kom før børshandelen opna i dag, godt mottatt. Ved børsslutt i går var kursen 10,20 kroner aksjen. Like etter børsopning var aksjekursen oppe i 12,50 kroner aksjen, før den fall ned igjen og slutta på 10,80 kroner, ein auke på 5,88 prosent i høve til i går.

Det auka børsverdien av selskapet med 14,8 millionar kroner, til 263 millionar kroner.

Å få klarsignal for studien fjerna risikoen for at selskapet ikkje fekk den naudsynte godkjenning for å sette i gang med studien. Å få rekruttert den første pasienten til studien reduserer uvissa hos investorane om selskapet greier å rekruttere nok personar til å gjennomføre studien. Difor er dette relevante meldingar til aksjemarknaden, seier administrerande direktør Christer Valderhaug i Arctic Bioscience til NETT NO.

For selskapet er forventninga at den medisinske studien skal ende opp med funn som til slutt gjer at Arctic Bioscience får godkjent produktet som eit legemiddel.

Dit fram er det eit godt stykke. Dagens melding er ein av fleire milepælar som må passerast, der kvart resultat kan ha betydning for kursutviklinga i selskapet.

Den medisinske studien som er i gang no skal etterfølgjast av nok ein studie. Om alt klaffar kan ei endleg avklaring kome i 2026.