Børsdagen: Sunnmøring flyg høgt på børs

Onsdag var ein dag utan større hendingar for dei børsnoterte selskapa frå Nordvestlandet. Difor rettar vi blikket mot flyselskapet Norwegian, som blir leia av Geir Karlsen frå Sykkylven.

Selskapet har ein kursoppgang på meir enn 60 prosent så langt i år, godt hjelpt av gode kvartalstal som ble lagt fram førre veke. Utviklinga får Barclays-analytikar Andrew Lobbenberg til å auke kursmålet frå 19 til 24 kroner, ifølgje Finansavisen.

Analytikaren grunngjev auken med at han trur Norwegian vil kome godt ut av Widerøe-kjøpet som formelt blei gjennomført førre månad. Flyselskapet betalte kring 1,1 milliardar kroner. Nokre av dei pengane tek også vegen til Sunnmøre, ettersom Sævik-familien har vore medeigarar i Widerøe.

Norwegian-aksjen var mellom dei mest omsette på Oslo børs onsdag, men fekk ein liten nedtur med eit fall på 0,48 prosent.

Karlsen kom frå stillinga som finansdirektør då han tok over leiinga av selskapet i 2021. Då hadde han leia den økonomiske ryddejobben selskapet måtte gjennom i åra før.

Av dei børsnoterte selskapa med adresse på Nordvestlandet, var det Norva24 som hadde den beste utviklinga onsdag. Aksjekursen gjekk opp kring 5,7 prosent til 28,55 kroner.

Selskapet som spring ut industrimiljøet i Stryn er notert på børsen i Stockholm, og legg fram kvartalstal på fredag.

Børstabell for Nordvestlandet: