Ekornes betrar resultatet

Inntektene til møbelprodusenten Ekornes var omlag like i første og andre kvartal i år.

Men resultatet før skatt gjekk frå minus 102 millioner kroner i første kvartal, til minus 1,6 millionar kroner i andre kvartal.

Det er kombinasjonen av kostnadskutt og prisauke som er årsak til betringa i resultatet, ifølgje kvartalsrapporten for 2. kvartal.

Med dagens ordreinngang og ordrereserve blir andre halvår likevel utfordrande for selskapet, ifølgje rapporten.

Les børsmelding her (ekstern lenke)

Stressless-stolar og sofaer sto for 74 prosent av inntektene til Ekornes i andre kvartal og bidro også mest til inntektsnedgangen. Spesielt Stressless sine kvilestolar hadde tilbakegang.

Skal løfte lønsemda
Tine Hammersnes Leopold kom inn som toppsjef i Ekornes i det boomen under koronapandemien ebba ut og har mellom anna redusert talet på tilsette for å kutte kostnadar.

I eit intervju med Nett No tidlegare i sommar fortalde ho korleis Ekornes både skal auke salet og lønsemda.

Kuttar modellar
Ekornes skal mellom anna redusere talet på modellar selskapet produserer både for å forenkle produksjon og sal. Ei slik forenkling er godt i gang for varemerket IMG, og skal også gjennomførast for Stressless.

Selskapet skal óg bruke meir på marknadsføring, spesielt mot forbrukarane, og modernisere det visuelle inntrykket og produktdesignet.

Hammersnes Leopold har også starta arbeidet med å samordne oppgåvene i konsernet for å bli kvitt doble prosessar og roller.