EU opnar tollfrie importkvotar for norsk sjømat

NPK-NTB: Avtalen gjeld fram til april 2028.

– EU er utan samanlikning den viktigaste marknaden for norsk sjømat, og fleire tollfrie kvotar gir fleire eksportmoglegheiter for norske produkt, både frå fiskeri og havbruk, seier fiskeri- og havminister Marianne Sivertsen Næss (Ap) i ei pressemelding.

Kvoteforhandlingane har gått føre seg parallelt med forhandlingane om kor mykje Noreg og dei andre EØS-landa Island og Liechtenstein skal betale i EØS-bidrag.

Avtalen om EØS-midlane vart underteikna førre veke. Den skal no til Stortinget for godkjenning.

Det vil likevel framleis ta nokre månader før sjømatnæringa kan ta dei nye kvotane i bruk.

– Vi er i dialog med EU for å finne ei løysing som bidreg til at næringa kan trekkje på dei tollfrie kvotane så snart som mogleg. Dette er noko Noreg har jobba for heile vegen, seier Næss.