Får drahjelp frå koronakrisa

- Både nye og eksisterande kundar kjem med produkt som dei har kjøpt ute tidlegare, seier dagleg leiar og hovudaksjonær Terje Berge i Galvano på Stranda.

Galvano er ei mekanisk industribedrift som lagar møbelkomponentar i metall og delvis også monterer møblar for ein del av kundane sine.

I år ligg selskapet an til rundt 33 prosent vekst i driftsinntekter, som betyr at Berge og kollegaene vil passere 40 millionar i driftsinntekter, som blir ny rekord. Omlag 60 prosent av veksten kjem av at storkunden Ekornes også er i sterk vekst, men resten heng delvis saman med at møbelprodusentane i Noreg vil ha leverandørane nærare seg.

Fabrikk i Polen
Veksten på Stranda fortel berre ein del av historia til Galvano. I fjor etablerte selskap eit 70 prosent eigd datterselskap i Polen, der selskapet tidlegare har hatt leigeproduksjon. Den fabrikken lagar meir arbeidsintensive produkt, og er både ein leverandør til morselskapet i Stranda og dels direkte til andre kundar.

Driftsinntektene til bedrifta i Polen blir 10-15 millionar kroner i år, anslår Berge.

Fabrikken i Polen har 19 tilsette, det same som verksemda i Stranda.

Fleire forespørslar
Marknadskontakt for den norske marknaden hos skumplastprodusenten Sandella, Thomas Fure, seier dei opplever at selskapet får fleire forespørslar frå potensielle kundar som vil ha ein leverandør i nærleiken.

Det handlar både om større leveringstryggleik og transportkostnadar, men og om at miljøargument er blitt viktigare, seier Fure. Det blir mindre utslepp med kortare transport.

Møbelvekst løftar Sykkylven Stål
I år er det leveransar til møbelindustrien som gir vekst hos Sykkylven Stål fortel dagleg leiar og medeigar Karl Inge Rekdal.

Selskapet har dei siste åra mellom anna satsa på å utvikle meir samansette møbelprodukt. Inntektene frå møbelbransjen veks med omlag 50 prosent i år, og gjer at selskapet samla sett ligg an til 20 prosent vekst i 2021, ifølgje Rekdal.

Samling i Sykkylven
I dag er møbelindustrien samla til bransjetreff for møbel- og designindustrisamling i Sykkylven.

Bransjesjef Egil Sundet i bransje- og arbeidsgivarorganisasjonen Norsk Industri seier norsk møbelproduksjon i dag er høgare enn den har vore på fem-seks år og at møbeleksporten som langt i år har auka med 28 prosent. I fjor steig den 11,3 prosent.