Fekk opptur under koronanedturen

Loen Skylift hadde driftsstans mellom 19. august og 25. september i fjor. I tillegg var det full stopp i mars-april og november-desember på grunn av koronarestriksjonar. Likevel auka selskapet bak satsinga både inntektene og resultat før skatt samanlikna med året før.

Dette kjem fram av årsmeldinga, som no er klar.

(saka held fram etter tabellen)

Koronakompensasjon
Driftsinntektene stoppa på 47,1 millionar kroner, opp 1,7 millionar kroner frå året før, medan resultatet før skatt enda på 12,8 millionar.

42,8 millionar kroner var reine billettinntekter, men selskapet fekk også tildelt 1,2 millionar i statleg kompensasjon under ordninga til selskap som har omsetningssvikt på grunn av koronarestriksjonane.

Selskapet har også krevd forsikringsselskapet om å få dekt påløpte kostnader og tapte inntekter under driftsstansen av pendelbana.

God juli
I fjor var det spesielt ein god juli som trekte opp, har dagleg leiar Richar Grov opplyst til NETT NO.

Etter at dei trudde «maksnivået» låg på kring 35.000 besøkande i juli månad, blei dei teke på senga då heile 57.000 personar tok turen i fjor.

I år vart trafikken litt lågare, men gondolbana tok likevel 49.000 besøkande i juli. Besøkstala betyr at fleire enn 1500 personar i snitt tek turen til topps ved fjellet Hoven dagleg.

– Vi er veldig godt nøgd. Investeringane vi har gjort, har fullt ut svart til forventingane. Besøket har også vore jamnt fordelt, sa Grov til NETT NO i august.

Gjeld på 154,7 millionar
Loen Skylift sysselsette i fjor 9,1 årsverk, og kjøpte i tillegg tenester hos hovedaksjonær Hotel Alexandra.

Pendelbane-utbyggar Garavento er nest største aksjonær.

Selskapet hadde ved årsskiftet ein samla eigenkapital på 165,8 millionar kroner, og ei langsiktig gjeld på 154,7 millionar.

Restauranten i pluss
Også for Restaurant Hoven på toppen av Hoven vart det inntektsvekst i fjor.

Dette selskapet er eit heileigd dotterselskap til Hotel Alexandra.

Inntektene kom opp i 17,2 millionar kroner, og resultatet før skatt enda på 2,2 millionar.

Her var det i fjor 13,3 årsverk.