Frp susar opp på målingane

(NPK-NTB-André Lorentsen): Det er publisert sju nasjonale stortingsmålingar no i september, og Sylvi Listhaug og Framstegspartiet er den klare vinnaren. Elles er endringane frå august minimale.

Høgre er klart størst, men får likevel berre 24,6 prosent i snitt i september. Partiet har hatt ein stor nedgang sidan august 2023 då dei oppnådde eit snitt på 30,4 prosent. Så seint som i februar i år vart dei målte til 27,7 prosent.

Høgres fall blir meir enn kompensert av Frps vekst. Frp har auka jamt frå 12,9 prosent i september i fjor til 18,9 prosent i år. Partiet ligg no berre 1,7 prosentpoeng bak Ap.

Vil sikre ein ny politisk kurs
Frp-leiar Sylvi Listhaug understrekar at det er lenge igjen til valet.

– Men det er hyggeleg med målingar som viser at fleire vil ha Frp-politikk, seier ho til NTB.

– Eg trur stadig fleire ser at Ap og Høgre har vorte veldig like i mange saker, og at Frp er alternativet i norsk politikk. Støre-regjeringa må vekk dersom vi skal gjenreise tilliten til norsk økonomi og sikre ein ny politisk kurs. Eit stort og sterkt Frp er nødvendig dersom vi ikkje berre skal skifte ut politikarane, men også politikken og ta Noreg i ei ny og betre retning.

Arbeidarpartiet har styrkt seg litt og ligg no stabilt rundt 20 prosent etter å ha hatt eit månadssnitt på 18–19 prosent i første halvår.

Kampen mot sperregrensa
MDG kjempar framleis mot sperregrensa og ligg stabilt mellom 3 og 4 prosent. Sist gong partiet klarte eit snitt på 4 prosent, var i mars. Det har berre skjedd fire gonger dei siste tre åra.

KrF er nede på 2,9 prosent i snitt, og det er det svakaste resultatet for partiet nokon gong på snittmålingane frå Poll of polls.

Mandatberekninga bygd på snitta av målingane i mai, gir eit komfortabelt borgarleg fleirtal med 91 mandat til Høgre, Frp, Venstre og KrF, der Høgre og Frp får 80 av desse. Partia på venstresida og MDG får til saman 78 mandat. Dei største endringane frå stortingsvalet i 2021 er at Høgre får ni nye mandat. Ap taper like mange, og Sp mistar 17 av dei 28 stortingsplassane sine. Frp får 14 fleire enn i 2021.

INP er størst blant dei mange småpartia i andre-kategorien med eit snitt på 1,7 prosent i september.

Det er i dag 347 dagar til stortingsvalet 8. september neste år.

Oversikt for alle partia
Endring i prosentpoeng og mandat frå stortingsvalet i 2021.

Høgre: 24,6 prosent +4,2 (45 mandat, +9)

Ap: 20,6 prosent -5,7 (39 mandat, -9)

Frp: 18,9 prosent +7,3 (35 mandat, +14)

SV: 9 prosent +1,3 (16 mandat, +3)

Sp: 6 prosent -7,5 (11 mandat, -17)

Venstre: 5,1 prosent +0,5 (9 mandat, +1)

Raudt: 5,6 prosent +0,9 (10 mandat, +2)

MDG: 3,3 prosent -0,7 (2 mandat, -1)

KrF: 2,9 prosent -0,9 (2 mandat, -1)

Andre: 3,9 prosent +0,4 (0 mandat, -1)

Kjelde: ( Poll of polls )

(©NPK)