Fylket styrer mot tøffare tider

Nærast tradisjonen tru, kom fylkeskommunedirektør Ottar Brage Guttelvik med eit stramt forslag til budsjett og økonomiplan for Møre og Romsdal dei komande åra.
Guttelvik har i fleire år vore tydeleg på at fylkeskommunen har store økonomiske utfordringar i vente.

Stor auke i lånekostnader

I forslaget til økonomiplan for 2021-2024, kjem det fram at utfordringane ligg an til å bli størst dei to siste åra av perioden.
– Vi er då langt frå å nå målsettinga om å ha eit netto driftsresultat på 2,5 prosent av brutto driftsinntekter. Grunnen til det er ei sterk auke i lånekostnadene mot slutten av perioden, til tross for historisk lågt rentenivå, heiter det i prognosen i måndag.
Guttelvik meiner det er ein konsekvens av eit høgt investeringsnivå over tid og at dei difor må halde «trøkket» oppe for å omstille til meir effektiv drift.

Størst investeringar på samferdsel

I planen med eit årleg driftsnivå på omlag 4,3 milliardar kroner, blir det lagt opp til eit investeringsnivå på 6,6 milliardar i fireårsperioden.
Dei største investeringane, vel 5,7 milliardar, går til samferdsel med mellom anna Nordøyvegen.
Samanlikna med kva politikarane har gått inn for, foreslår Guttelvik også fleire endringar.

• I økonomiplanframlegget foreslår fylkeskommunedirektøren å auke ferjetakstane med ei takstsone – ikkje to, som tidlegare vedteke.
• Fleire driftskontraktar på fylkesveg har vore ute på anbod, og kontraktar som er inngått medfører ein sterk utgiftsvekst. I 2021 utgjer dette drygt 72 millionar, og aukar betydeleg til 182 i 2024.
• Det er underdekning på om lag 16,1 millionar kroner til utgifter som er gått til konsulenttenester på samferdselsområdet
• Det ikkje lagt opp til endring i skolestrukturen utover dei vedtekne administrative samanslåingane dei næraste åra. Klassetalet aukar med 13 klassar.
• Fylkeskommunedirektøren tilrår å oppretthalde fem tannklinikkar i Fosnavåg, Stranda, Langevåg, Midsund og Averøy.

Nøkkeltal i budsjettet for 2021:
Driftsramme : 4,3 milliardar kroner
Investeringsbudsjett: 2,3 milliardar kroner
Netto driftsresultat: 168,3 millionar kroner
(eksternlenke)