Eit varmeanlegg som fyrer med kvist og greiner frå tømmerdrift har erstatta tidlegare olje- og gassfyring hos møbeltekstilprodusenten Innvik, i Innvik i Stryn. Det gir eit kraftig kutt i CO2-utslepprekneskapen til bedrifta og det set kundane pris på.
Samanlikna med tidlegare har selskapet redusert CO2-utsleppa med 95 prosent, og det er ein av faktorane som forklarar auka sal og ein inntektsvekst på 30 prosent frå 2023 til 2024, ifølgje dagleg leiar og medeigar Bjørn Aage Haugen.
– Vi opplever at det er ein veldig viktig faktor, seier Haugen.
I tillegg lukkast selskapet også med produktutvikling og har ein god kvalitet i produksjonen, ifølgje Haugen.
Over 100 millionar
Haugen seier selskapet investerte omlag 90 millionar kroner i å utvide produksjonskapasiteten og få bygd eit fyringsanlegg. Det er investeringa medverkar til å redusere overskotet, men allereie i år reknar Haugen med at selskapet tek eit langt steg mot målet om å ha eit driftsresultat på 10 prosent av inntektene.
Salet har også starta godt i år og per i dag ligg Innvik an til ei inntekt på "godt over 100 millionar kroner" i 2025, seier Haugen.
I tillegg til å forsyne Innvik med varme til dampproduksjon forsyner varmeanlegget - som blir drive av Solør Bioenergi - også skulen og omsorgsenteret i bygda med varme.
Dansk medeigar
Innvik er det viktigaste selskapet i Innvik Holding-konsernet og sysselset omlag 60 personar.
Innvik er eigd 70 prosent av Innvik Holding og 30 prosent av det danske tekstilkonsernet Kvadrat.
Innvik Holding er eigd av fleire meldlemer i Haugenfamilien, med Bjørn Aage Haugen som største eigar, gjennom hans eige selskap Haugen Rådgiving.
Innvik as | ||
Tal i mill. kroner | 2024 | 2023 |
Driftsinntekt | 84,6 | 65,0 |
Driftsresultat | 4,4 | 2,3 |
Resultat før skatt | 1,1 | 0,7 |
Publisert: 18.02.2025 11:09
Sist oppdatert: 18.02.2025 18:37