Generasjonskifte i Aas Mek. Verksted

Konsernet Maritime Holding på Vestnes, der skipsverftet Aas Mek. Verksted er det klart viktigast selskapet, hadde rekordlønsemd i 2017 (sjå tabell).
Resultatet i prosent av driftsinntektene blei 32 prosent.
Selskapet betaler ut 60 millionar i utbytte etter 2017, og 90 millionar kroner i utbytte etter 2016.
I åra 2010-2015 varierte utbyttet mellom 15 og 21 millionar kroner.

Endring på eigarsida

I 2016-reknskapen til Maritime Holding står aksjeselskapa Halmo, Soas og Johi oppført som eigarar med ein tredjepart av aksjane kvar.
Halmo as er eigd av dagleg leiar Halvard Aas (62 år), Soas av Olav Aas (67) og Johi av Johan Aas (71).
2017-reknskapen viser endringa i eigarskapen.
No ser den slik ut (eigar av selskap, og alder i parantes):
Vestnes Holding as 33,33 prosent (Hans Inge Aas, 34)
Grova Invest as 22,1 prosent (Frode Johan Aas, 36)
Kias as 11,05 prosent (Kim Andre Kirksæther Aas, 37)
Bmaas as 11,05 prosent (Bjørn Magne Aas, 35)
Johi as 11,22 prosent
Halmo as 11,22 prosent

Brønnbåtbyggar

Aas Mek. Verksted har hatt suksess med bygging av brønnbåtar.
Neste år skal verftet levere fire brønnbåtar, og ser optimistisk på sjansane til å få fleire oppdrag.
"Etterspørselen etter nybygg har økt betydelig det siste året, og det jobbes med tilbud på flere ulike nybygg med planlagt levering i 2020", skriv Aas Mek. Verksted i årsmeldinga for 2017.
Konsernet sysselsette 55 årsverk i 2017.