Gjekk forbi Geiranger

Seawalk Nordfjord nesten dobla inntektene på å få cruiseturistar tørrskodde i land på Nordfjordeid i fjor.

Selskapet hadde sitt første driftsår i 2019, same år som Nordfjordeid fekk sitt første cruiseskipsbesøk. Då var inntektene beskjedne to millionar kroner, og åra 2020-2021 var prega av laber aktivitet på grunn av koronapandemien.

I 2022 kom det fart i marknaden igjen. Veksten held fram i fjor, og selskapet fekk også høgare inntekter enn Seawalk Geiranger. (sjå tabell). Seawalk Geiranger blei etablert i 2013.

Erstattar djupvasskai
Det er selskapet Seawalk i Bergen som står bak ideen om dei flytande foldbare cruiseskipskaiene. Seawalk er medeigar både på Nordfjordeid (39 prosent) og i Geiranger (24,2 prosent direkte, i tillegg til at dagleg leiar og Seawalk-medeigar Arthur Kordt er medeigar i Geiranger Cruise Handling, som eig 25,9 prosent).

I Seawalk Nordfjord er Jon Olav Lefdals selskap, Lefdal Invest, største aksjonær med 61 prosent av aksjane.

Foldbare flytekaier gjer at cruiseskipa kan sende gjestane tørrskodde i land, sjølv om både Geiranger og Nordfjordeid manglar djupvasskai som cruiseskip kan legge til ved.

Koronastopp, så vekst
Nordfjordeid hadde sitt første cruiseskipsbesøk i 2019. Då kom 19 skip på besøk og la til ved flytekaia som passasjerarene brukar til å gå i land. Deretter kom koronapandemien, og korkje i 2020 eller 2021 kom det cruseskip på besøk.

I 2022 kom 50 cruiseskip på besøk, og i mars 2023 hadde Nordfjordeid fått reservert 77 for heile 2023 - og allereie 85 besøkt for 2024.