Gjerde på agentjakt i Afrika

Cape Town:

Med det har også sjefen for John Gjerde AS komme eit steg vidare med tanke på sal av ventilar frå Gjerdsvika til båtar og riggar i Sør-Afrika.
Dagleg ligg det 15-20 fartøy som ventar på losse- og lastetørn i bukta utanfor Cape Town, på begge sider av Robben Island, fangeøya der Nelson Mandela sona i 18 år. Inne i hamna ruvar to boreriggar, den eine frå Transocean, og i dokka som er klemt inn mellom handelssenter og museum i turistområdet Waterfront, luktar det blymønje og brent stål.

Aluminiumsbåtar

Her er stort anløp av mange ulike typar fartøy, konstaterer Roger Gjerde, for første gong på besøk i millionbyen på sørvestspissen av Afrika, men det er nybygg som har fanga mest interesse. Etter ei rekkje møte med aktuelle kundar og samarbeidspartnarar, oppsummerer han slik:
- Det er fleire verft som byggjer aluminiumsbåtar her, arbeidsbåtar, patruljebåtar og lystyachtar, og det er her eg ser dei største mulegheitene.
Sørafrikanske verft byggjer fartøy i aluminum opp til 50 meter, mellom anna til transport av mannskap, mindre oljeservicefartøy og raske patruljebåtar til Nigeria og den vestafrikanske marknaden.

Lanserer ny ventil

John Gjerde AS leverer eit stort utval ventilar til skip og riggar. Øvst i reiseveska hadde Roger Gjerde med seg brosjyrar for den nyaste i portefølja.
- ”Hide” vart lansert sist sommar. Den er liten og lett og passar godt på hurtiggåande båtar. Tidlegare har vi tapt på vekt i høve til denne fartøygruppa, seier Gjerde.
Dei som kjenner gardsnamna i Gjerdsvika, veit at Hide er den første garden i bygda når ein kjem frå Moltustranda. På engelsk betyr ordet ”gøyme” og høver for ein ventil som er liten og lett og ikkje gjer mykje av seg. Dessutan er Hide eit godt namn å uttale for kinesarar og andre asiatar, understrekar Roger Gjerde.
Hide er ein tryggleiksventil for ulike servicetankar, som drivstoff- og stabiliserings- og vasstankar. Ein ventil som hindrar sjøvatn frå dekk å renne ned i tankane.

Ryddige forhold

Det står att å sjå om ventilen fell i smak hos afrikanarane, men førsteinntrykket var godt.
- Eg vart overraska over kor ryddige forretningsforhold det ser ut til å vere her. Det skal god planlegging til for å byggje ein båt her, i motsetnad til på Sunnmøre der ein kan hente alt i nabolaget.
- Vi var på jakt etter ein agent, og eg trur vi har funne det. Han fann produktet vårt veldig interessant og skal prøve det ut før vi eventuelt gjer ein endeleg avtale, seier Gjerde.

Store hamnebyar

Roger Gjerde ser også eit stort potensial i reparasjonsmarknaden, ut frå den sentrale plasseringa til byar som Cape Town og Durban.
Cape Town vart grunnlagd på sørvestspissen av kontinentet midt på 1600-talet nettopp fordi det var ein eigna forsyningsbase for nederlandske handelsskip som skulle vidare til koloniane i søraust Asia, og framleis har Kappstaden ei viktig rolle som hamneby. Auka leiteaktivitet og lovande olje- og gassfunn både på sørvest- og søraustkysten av Afrika, vil truleg bety enda meir trafikk.

Flagga ut

John Gjerde AS har 43 års erfaring i bransjen, og Roger Gjerde (57) har vakse opp i og med fabrikken. Han hadde planar om ein lengre karriere til sjøs, men fann fort meining i å utvikle bedrifta medan faren John var ordførar og samfunnsbyggjar på andre felt.
På slutten av 1990-åra var økonomien og bedrifta pressa, og eigarane bestemte seg for å flytte produksjonen av ventilar til Latvia. Arbeidet tok til i 2000 og to år seinare var dei i gang. Seinare har dei utvida fabrikken som i dag har 20 tilsette.
- Vi hadde ikkje noko val den gongen, dersom vi skulle overleve, seier Roger Gjerde.

Utviklar lokalt

Han understrekar at utviklingsarbeid og produksjon av prototypar framleis skjer på heimebøen i Gjerdsvika, gjennom dotterselskapet JG-Produksjon som elles tek oppdrag for verft og andre lokale verksemder.
- Vi har alle testlokalitetar her og klasseselskapa (dei som godkjenner utstyret, red. merk.) kjem til oss, og vi har eit svært godt samarbeid med professor Magnar Førde, som er tilknytt Rolls-Royce Marine, seier Gjerde.
- No ser vi fleire døme på at norske bedrifter hentar heim produksjon?
- Ja, og det er interessant, og vi vil nok sjå fleire døme på det. Om det skjer hos oss, kan eg ikkje seie noko om i dag, seier Roger Gjerde.