Superlønsemd og dobla omsetning for Norwind

NETT NO-barometeret

I løpet av få år har Norwind Offshore bygd seg opp til ein flåte på fem skip – og fleire er på veg. 

Fjorårets rekneskap viser at det har vore ei fruktbar satsing. Reiarlaget plasserer seg heilt i toppen når det kjem til lønsemd i Nett No sin resultatoversikt for reiarlaga på Nordvestlandet. 

• Sjå tabell med resultata til reiarlaga under saka

Overskotet gjorde eit solid hopp
Omsetninga til Norwind Offshore vart meir enn dobla frå kring 250 millionar i 2023, til nær 560 millionar kroner i fjor. 

Resultatet før skatt auka endå meir. I 2023 enda det på nær 85 millionar, medan det i fjor gjorde eit hopp til over 223 millionar kroner. 

– Vi hadde eit aktivt år med levering av tre skip i løpet av 2024. Det gjorde at også inntektene gjekk opp, fortel Norwind Offshore-sjef Svein Leon Aure til Nett No.

Skip nummer fem, Norwind Helm, blei levert mot slutten av fjoråret, medan Norwind Storm blei teke i bruk i fjor sommar.

Ratar på over 700.000 kroner dagen
Med fem skip i drift heile året, ligg det en til at omsetninga til Norwind aukar enda nokre hakk i 2025. 

– Det gir sjølvsagt meir aktivitet og meir inntekter, seier Aure. 

Sjølv om det har vore periodar i sommar med dårlegare betaling enn venta på forsyningsskip og ankerhandteringsskip, er Norwind-sjefen nøgd med situasjonen for deira segment.

– Både i fjor og i år har det vore god aktivitet, som gjer at båtane stort sett har vore har engasjert og sysselsett heile tida, seier han. 

I sommar har det vore ratar heilt oppe i 700.000 kroner dagen. Men det høyrer til unntaka – og Aure fortel at dei ikkje har vore heilt oppe på det nivået. 

Jobbar ikkje berre med vindkraft
Flåten til Ålesund-reiarlaget var i utgangspunktet meint for oppdrag i vindkraftindustrien. Dei opplever samtidig etterspurnad frå fleire hald. 

– Det meste av oppdraga har vore i vind, men det har også vore ein del å gjere innan gassutvinning. Etter at Russland invaderte Ukraina har fleire – mellom anna Danmark – gjort mykje for å auke sin gassproduksjon, fortel Svein Leon Aure. 

I dag er to Norwind-skip på tre-årskontraktar, medan eitt er på to-årskontrakt. Dei andre har teke ulike oppdrag i spotmarknaden. 

• Sjå tabell med resultata til reiarlaga under saka

Spent på utviklinga med fleire nye skip 
Med fleire nybygg på veg inn i marknaden er Norwind-sjefen spent på utviklinga framover. Nærare 60 nye skip er venta å bli klare for vindkraftmarknaden i åra fram til 2028, skriv reiarlaget i si årsmelding. 

– Vi er spent på korleis marknaden vil absorbere dei nye skipa, men trur det går greitt. Men så er det spennande å sjå kva anna som skjer, seier Aure.  

Etter at president Trump i USA kom til makta, er fleire vindkraftprosjekt blir stoppa, eller utsett. Det er også større usikkerheit kring framtidige utbyggingar. 

– Så det er nokre mørka skyar i horisonten også. Vi er avhengig av at aktiviteten blir halde oppe, legg han til. 

Ventar tre nye skip i flåten
Norwind-reiarlaget ventar også tre nye skip inn i si eiga flåte dei neste åra. To av desse skipa vil vere eigd av samarbeidspartnarane i Navigare Capital Partners, og bli drifta av Ålesund-reiarlaget. 

Vard har sikra seg kontrakt på bygging av alle tre skipa.

– Det første er kome til Vard Søviknes, og skal leverast i januar. Det vil gå rett inn i ei tiårskontrakt frå levering. På det andre skipet har det vore brennestart for skroget. Også dette skal leverast frå Søviknes-verftet, fortel Aure. 

Skip nummer tre vert skal byggast ved Vard sitt verft i Vietnam. 

Norwind-sjefen fortel at det er «stor rift om dei flinkaste folka». Likevel har det gått greitt å bemanne skipa, og han fortel at dei har ei «solid stamme med veldig gode mannskap». 

Kraftig auke i omsetninga
Resultatoversikta for reiarlaget frå Nordvestlandet viser at dei samla inntektene gjekk kraftig opp i fjor. Knappe 17,4 milliardar i omsetning vart fasiten – etter ei auke på nær fire milliardar kroner. 

Det samla overskotet enda på nivå med 2023 med kring 2,8 milliardar kroner i resultat før skatt. 

• Sjå tabell med resultata til reiarlaga under saka

Fleire reiarlag har ei lønnsemd på nivå med Norwind-reiarlaget som har ein resultatmargin på drygt 39 prosent. 

Det gjeld Olympic og Rem Offshore-reiarlaga i Herøy og Sølvtrans-reiarlaget i Ålesund. Sistnemnte sitt overskott var samtidig eit delvis resultat frå sal av to brønnbåtar.

Bourbon Offshore Norway Holding er heilt på topp i lønnsemd med ein resultatmargin på over 50 prosent – men bak superlønnsemda ligg også ekstraordinære inntekter frå sal av skip. 

• Nett No-barometeret: Les fleire bransjesaker 

Retting: I den første versjonen av denne saka var Sanco Group-konsernet ikkje med i oversikta. Tabellen og teksten er justert i etterkant. Rettinga blei gjort fredag 29. august klokka 13.21

• Les resultatsaker for ulike reiarlag under