Golden Energy driv Ulstein-skip

Blue Ship Invest er det skipseigande investeringselskapet i Ulsmo-konsernet, som i januar i år starta bygging av to plattform forsyningskip ved Ulstein Verft.

No er det klart at skipa skal drivast av offshorereiarlaget Golden Energy Offshore i Ålesund.

10 skip i flåten

- Vi får auka volum. Det betyr mykje, seier administerande direktør Per Ivar Fagervoll i Golden Energy Offshore.
Medrekna dei to plattformforsyningskipa frå Blue Ship Invest, har Golden Energy Offshore no ti skip i flåten. Fem er eigde av reiarlaget, fem blir drivne på oppdrag for andre.

Kontakten gir arbeid til 50 tilsette i Golden Energy Offshore, medrekna mannskap og folk i administrasjonen.

Skal skaffe oppdrag

Golden Energy Offshore har ansvar for både teknisk og kommersiell drift av dei to Blue Ship Invest-fartya. Det betyr at reiarlaget skal skaffe mannskap og utruste skipa, og også sørge for at dei får oppdrag.
Dei to Blue Ship Invest-skipa skal leverast frå verftet i første kvartal 2015.
Fagervoll seier skipa i første omgang blir prøvd utleigd i spotmarknaden.