Har alle i arbeid etter fjorårsdupp

Vik Ørsta hadde eit tøffare år i 2023, etter fleire jubelår med stor omsetningsauke og rekordhøge overskot.

Rekneskapen viser ein knekk i inntektene frå 850 til 715 millionar. Også lønnsemda vart kraftig svekka og resultat før skatt vart berre kring ein tredel av året før (sjå tabell under).

Permitterte i fjor
Selskapet har produksjonsanlegg i Ørsta og i Vik i Sogn, og lagar mellom anna lysmaster, autovernskinner og sikringsboltar for veg- og tunnelanlegg.

Nedgangen i aktiviteten førte mellom anna til at kring 30 tilsette blei permittert mot slutten av fjoråret. Fleire takka også ja til å gå av med pensjon tidlegare enn planlagt.

Ved inngangen til 2024 var det framleis permitteringar - som blei gradvis reduserte.

Alle i arbeid frå mai
Over halvvegs i 2024 kan Vik Ørsta-sjef Kjetil Nesset fortelje at dei har klart å halde alle i arbeid frå mai månad – og ventar at det vil halde fram.

– Vi sleit periodevis med sysselsetting på grunn av dårleg tilgang på råvarer. No har vi alle i arbeid, og vi går inn i hausten som er høgsesong, så vi ventar å halde alle i arbeid vidare, seier han til Nett No.

Årsmeldinga stadfestar at selskapet har klart å halde sysselsettinga oppe med 252 årsverk i arbeid i løpet av året – berre fire færre enn året før.

Ventar vekst og auka lønnsemd i år
Bakgrunnen for nedgangen i fjor er mellom anna krigen i Ukraina, som har ført til høgare råvarekostnadar, energiprisar og redusert tilgang på nokre råvarer.

I år fortel Kjetil Nesset at dei ligg an til ny vekst.

– Det blir betre i år, og vi kjem til å auke inntektene opp mot 800 millionar. Vi når nok ikkje heilt opp til dei siste toppåra, men også lønnsemda blir betre i år samanlikna med i fjor, seier han vidare.

Framleis solid utbytte
Vik Ørsta er ein del av Saferoad-konsernet, som fekk tilført kring 110 millionar i konsernbidrag frå Ørsta-selskapet i 2021 og 2022.

Etter 2023 er konsernbidraget på knappe 16 millionar.

I 2007 blei det som då var Ørsta Gruppen slått saman med Euroskilt - og Saferoad-konsernet etablert. Året etter blei Vik Verk i Sogn ein del av konsernet.

Eit investeringsfond i det svenske Nordic Capital-systemet kjøpte Saferoad i 2008. I 2017 vart konsernet børsnotert og året etter tok investeringsfond styrt av FSN Capital over som eigar.