Har fått med sveitsisk investor på miljøsatsing

Tysdag er det klart for fagleg og sosialt påfyll under Leiarkonferansen i Ulsteinvik.

Brian Tsuyoshi Takeda er mellom dei som skal på scena. Då skal Ulstein-gründeren fortelje om satsinga med selskapet Restorae.

– Vi skal i hovudsak jobbe med å restaurere miljøet. Det skal vi gjere ved å utvikle teknologi for miljørestaurering og forretningsmodellar for det same, fortel Takeda til Nett No. 

Dei er allereie oppe i fire tilsette, og skal i løpet av kort tid tilsette ein marinbiolog. Då har dei på plass det som vil utgjere «kjerneteamet».

– Vi reknar også med at det kan bli fleire tilsettingar allereie i løpet av året, fortel Takeda.

– Godt finansiert og er klare til å køyre på
Selskapet som har base i Ulsteinvik, blei starta av Takeda og Leif Rune Solås ved årsskiftet. I løpet av året har dei fått med seg ein hovudinvestor frå Sveits på laget. 

– Vi er godt finansiert og er klare til å køyre på med planane våre, seier Takeda som førebels ikkje vil gå ut med namnet på investoren.

Restorae vil både utvikle eigne teknologiar, der dei sett inn eigne folk på satsingar dei har trua på, og vere konsulentar for verksemder som står på eigne bein. 

– Der vi ikkje har direkte kompetanse eller kapasitet, kan vi vere ein konsulent eller investor. Kravet er at selskapet både bidreg til å restaurere miljøet – og tenar pengar, legg Takeda til. 

Opplever å ha bygd tillit
Tidlegare har Takeda etablert Urchinomics som jobba med å utvikle kråkebolleoppdrett og samtidig restaurere tareskog. Han har også halde foredrag om arbeidet i World Economic Forum og FN.

Han opplever at det tidlegare arbeidet har vore med å bygge opp tillit som Restorae nyter godt av.

– Det gjer at vi trekk til oss den type investorar som vi ønsker oss. Restorae bygger på same tankegangen som Urchinomics, men vi tenker breiare og vil drive miljørestaurering både i havet og på land, seier Takeda. 

Trur EU-reglar vil gjere dei meir attraktive
Gründeren trur mellom anna komande EU-reglar vil gjere verksemda meir attraktiv framover. 

– The EU Nature Restoration Law trår i kraft i 2026, og vil også gjelde Noreg. Den seier at 20 prosent av alle hav- og landområde skal vere i betring allereie innan 2030. EU-systemet er rigga for dette, men det får lite merksemd her til lands, påpeiker Takeda. 

Variert program på konferansen
«Frå samarbeid til suksess», er temaet for Leiarkonferansen i år. Arrangørane skriv at dei vil «løfte fram viktigheita av korleis kultur påverkar samspel, samarbeid og det å sjå og løfte kvarandre opp og fram». 

Undervegs blir det mellom anna innblikk i dagens Europa og Noregs rolle ved forfattar og journalist Simen Ekern, medan gründer av Arbeidsmiljølegen, Kristin P. Mølmann, skal snakke om samanhengen mellom helse og arbeid.  

Mot slutten av dagen samlast trioen Anja Solevågseide, Torill Standal Eliassen og Rita Sævik til sofaprat.

I alt er det 12 foredragsholdarar på programmet for konferansen som blir avslutta med Mørelounge og foredrag med fotballtrenar Per Joar Hansen.