Har fleire lærlingplassar enn lærlingar

Møre og Romsdal har eit overskot av lærlingplassar i verft og maritim utstyrsindustri. Problemet er å få nok unge til å fylle læreplassane.

Måndag er rekruttering tema på ein konferanse i Ålesund i regi av Vestlandsrådet, i samarbeid med Maritimt Forum Nordvest og Opplæringskontoret for tekniske fag Sunnmøre.

Kort fortalt: Bedriftene i verftsbransjen og maritim utstyrsindustri treng flere folk.

Negativ befolkningsprognose
Maritimt Forum-sjef Fride Solbakken seier til Nett No at det er fleire faktorar bak rekrutteringsutfordringa både for industri og reiarlag:

• Mange sjøfolk nærmar seg pensjonsalderen.
• Sjøforsvaret rustar opp. Det betyr både bygge- og vedlikehaldsoppdrag.
• Elevkulla krympar. Møre og Romsdal fylke anslår at det blir omlag 1700 færre elevar i vidaregåande skule i fylket i 2040 enn i dag. 

Krevande å rekruttere
No er skipsverfta inne i ei periode med høg aktivitet og det er krevande å rekruttere fagfolk, seier dagleg leiar Dag Vikestrand i Fiskerstrand Verft til Nett No. 

Han representerte skipsbyggarane blant innleiarane på konferansen. Fiskerstrand Verft satsar på lærlingar, og har kontakt med skuleverket allereie frå elevane går i 5. klasse på barneskulen.

Men det er kanskje ikkje nok. Kanskje bør dei starte allereie på barnehagen, fleipa han.