Har stressmestring som levebrød

Gründeren Hanne Suorza frå Sykkylven har gjennom fleire år jobba med ein app som skal hjelpe folk med korleis dei kan takle stress.

Utviklingsarbeidet er gjort i samarbeid med psykiater Bjarte Stubhaug, og i første omgang retta dei seg inn mot privatmarknaden. No opplever dei auka interesse – også frå næringslivet.

– Etter kvart har vi lagt inn meir arbeidsrelatert innhald og laga eit bedriftsabonnement. Dette har ulike type arbeidsplassar no teke i bruk, seier Suorza til Nett No.

Teke i bruk ved ulike arbeidsplassar
Gründeren påpeiker at mykje av sjukefråværet i arbeidslivet har med stress å gjere. Samtidig er ho ikkje i tvil om at deira verktøy kan hjelpe dei som møter utfordringar.

Appen kan vere tilpassa ulike tema. Mykje dreiar seg om å handtere tids- og effektivitetspress. No har dei alt frå skule og barnehagar til møbelbedrifter og daglegvarebutikkar, mellom sine abonnentar.

– Den store motivasjonsfaktoren er å få høyre at det utgjer ein forskjell i folk sine liv, fortel Suorza.

Tilbyr praktiske økter for bedrifter
Eit nytt tilbod for lokale bedrifter er praktiske økter, og første treff skjer på Pir Cowork i Ålesund i morgon, tysdag. Morgonsamlinga blir leia av Suorza som er mindfulness-instruktør.

– Dei som kjem vil få høyre om praktiske verktøy for å handtere stress og skape ro, og til eksempel handtere digitale forstyrringar både på jobb og heime. Det blir også fokus på pust og korleis ein kan øve seg på å vere til stades, fortel ho.

Mindfulness er eigentleg berre er eit anna ord for å vere til stades, ifølgje Suorza.

– Vi nyttar ein anerkjent metodikk. Samtidig har vi mykje medisinsk tyngde i prosjektet som gjer at Mestre-appen skil seg ut. Det er forskingsbasert kunnskap om kropp og sinn, legg ho til.

– Målet er å skalere opp
Saman med psykiater Bjarte Stubhaug har Suorza mellom anna laga fleire enn 100 podcast-episodar om mental helse. Fleire oppdrag for bedrifter er med å utvide grunnlaget for verksemda.

Dei har óg delteke i gründerkonkuransen Næringsteft og kom på 2. plass i 2022. Då vart dei utfordra på kva for vidare mål dei har med arbeidet og selskapet.

– Vi har planar om vekst, både i produkttilbodet og talet på kundar. Målet er å skalere opp på ein måte som sikrar høg kvalitet og verdi for kundane våre, fortel Suorza.