Havila kjøper skipet til sysselmeisteren

Havila Holding kjøper Sysselmeisteren på Svalbard sitt tenestefartøy, Polarsyssel, frå Fafnir Norway. Det kjem fram i ei pressemelding. 

Kjøpet blir gjort gjennom selskapet Havila Skipsinvest 2.

Skipet patruljerer i farvatna rundt Svalbard og gjennomfører inspeksjon og kontroll av skip og tilreisande, redningsoppdrag, miljøovervaking og oljeberedskap.

Naturleg steg, ifølgje Sævik
Skipet har vore eigd av Fafnir sidan det var nytt i 2014 og drifta av Havila sidan 2015. 

Styreleiar i Havila Holding, Njål Sævik, seier at det no var eit naturleg steg vidare å ta hand også om eigarskapen.

– Vi kjenner båt og mannskap og veit at dette er eit godt drifta og vedlikehalde skip som er godt tilrettelagt for ny kontrakt og ny teneste for Sysselmeisteren. Vi ser fram til å halde fram det gode samarbeidet og levere eit viktig bidrag til sikkerheit og beredskap rundt Svalbard, uttaler Sævik i meldinga. 

Har ny 5-årig kontrakt
Det er inngått ny 5-årig kontrakt med Sysselmeisteren frå 1. januar 2026 med to årlege opsjonar i tillegg. 

Ifølgje Sævik bygger kjøpet av Polarsyssel reiarlag- og offshoredelen av Herøy-konsernet vidare.

I fjor kjøpte Havila Volstad Maritime, som fekk namnet Havila Subsea & Renewables. I tillegg har ein dei siste åra bygd opp reiarlaget Havila Kystruten. 

Til saman utgjer dette nær 1600 arbeidsplassar. 

Gir arbeid til kring 20 personar
Kring 20 personar har arbeidsplassen sin om bord i Polarsyssel. Overtakinga vil ikkje påverke desse. 

I samband med den nye kontrakten og tiårs-klassing var Polarsyssel nyleg gjennom ei større oppgradering med nytt helikopterdekk og ny kran akter som kan løfte om bord Fjordsyssel, arbeidsbåten til Sysselmeisteren. 

I tillegg blei det gjort andre oppgraderingar om bord.