Årets næringslivsmagasin for Sunnmøre, Romsdal, og Nordfjord er ute! «Gode tider, tøffare tider», heiter det i årets Nett No-magasin som no er tilgjengeleg digitalt og i papirutgåve på 76 sider.
- Årets magasin kjem i posten til fleire tusen bedrifter på Nordvestlandet. Det blir også bli lagt ut på møteplassar og konferansar i tida framover.
Du kan lese magasinet digitalt her
Fullskalakrigen i Ukraina har snart vart i fire år, det grøne skiftet er erstatta med beredskap og opprusting som hovudtema på det som er av næringslivskonferansar, Noreg og Europa rustar opp, og Donald Trump bygger tollmurar.
Dette er utgangspunktet for fleire av artiklane i 2025-utgåva av Nett No-magasinet, den 13. årgangen i rekka.
Det er ei kolossal endring sidan Nett No publiserte sin første artikkel i november i 2013. Då levde vi framleis i ei etter-kaldkrigstid. Forsvar og beredskap stod langt nede på den politiske prioriteringslista, verdshandelen flaut fritt, og Erna Solberg si regjering la seg i selen for å innynde seg hos kinesarane att etter at den kinesiske dissidenten Liu Xiabo fekk Nobels fredspris i 2010. I dag ser det dystrare ut.
Men risikoen for at dystre spådommar slår til, minkar om ein bur seg på å forhindre dei, og vonleg er det nettopp det som er i ferd med å skje.
Den årlege gjennomgangen av tilstanden til bedriftene på Nordvestlandet, som vi tek i kvart Nett No-magasin, viser at også 2024 vart eit godt år for næringslivet i regionen vår.
Det er unntak, men i hovudsak er rekruttering ei større utfordring enn å få nye oppdrag. Også 2025 ser ut til å bli bra, og hos den viktige maritime klynga ventar bedriftene vekst også i 2026.
I årets magasin kan du mellom anna lese om korleis Hareid har greidd å bli ein kommune som no trekker til seg nye bedrifter og aukar folketalet. Hurtigbåten til Ålesund og fastlandssambandet til heile søre Sunnmøre har blitt eit trekkplaster. Utgangspunktet for artikkelen er den generelle folketalsutviklinga, med færre babyar og relativt fleire eldre. Den utviklinga gjer at konkurransen om arbeidskrafta berre blir større framover.
Hos Nordfjordkompaniet har dei trua på at rekrutteringsarbeid må starte tidleg. Der startar dei allereie i barnehagen, med lesestund og bedriftsbesøk for femåringane. Vidare blir unge nordfjordingar følgde opp gjennom grunnskulen og den vidaregåande skulen, i ei rekke lærlingprogram og på studium utanfor Nordfjord. Alle som vil, kan bli med i eit nettverk, der dei får melding om ledige jobbar i regionane kvar veke og større nyheitsbrev fleire gonger i året.
Dei som melder om interesse for ein jobb, får personleg oppfølging – og dei får mellom anna også hjelp til å finne arbeid til e in eventuell partnar.
Vi fortel også korleis bedrifter som Ekornes og Ulstein Betong har snudd seg mot forsvarsmarknaden, og om den mekaniske industribedrifta Simek i Stordal, som har fått vekst takka vere oppdrag for forsvarsmarknaden.
Men alt er ikkje forsvar og beredskap.
Bli òg med til Fedje nord for Bergen, der eit investornettverk for kvinner satsar på whisky-produksjon på Øya.
Vi håpar at magasinet fell i smak. God lesing!
Ogne Øyehaug, Marius Rosbach, Karoline Prytz Berset og Paula Zwolenski.
Publisert: 13.11.2025 11:25
Sist oppdatert: 13.11.2025 11:28
