Hexagon Purus-sjefen er styrka i trua

Inntektene til Hexagon Purus var 67 prosent høgare i 1. kvartal i år enn i same kvartal i fjor. Høgare inntekt betyr også betra lønsemd.

Les børsmelding her (ekstern lenke)

I kvartalsrapporten skriv administrerande direktør Morten Holum, at selskapet er svært sikre på at 2024 blir året då Hexagon Purus passerer punktet for at selskapet får driftsoverskot før av- og nedskrivingar (ebtida) på verksemda i hydrogenmarknanden.

Og 2025 blir det første året der Hexagon Purus oppnår det tilsvarande for heile selskapet, heiter det vidare.

Klikk her for å sjå resultatpresentasjon i opptak (ekstern lenke)

Krympar underskotet
Som det går fram av tabellen (sjå under) hadde Hexagon Purus eit ebtida-resultat på minus 96,7 millionar kroner i første kvartal. Det er ei forbetring frå minus 113 millionar kroner i same kvartal i fjor.

Ved utgangen av 2023 rapporterte Hexagon Purus at dei låg etter sine eigne vekstmål fordi utstyr til fabrikken i Kassel i Tyskland var forseinka. Fabrikken lagar tankar for hydrogen.

No ventar selskapet at alt skal vere på plass i Tyskland i løpet av 2. kvartal.

Skilt ut frå Hexagon Composites
Hexagon Composites er største aksjonær i Hexagon Purus, med 34,8 prosent eigarandel.

Dei lagar tankar for bruk av natur- og biogass som energikjelde, medan Hexagon Purus lagar tilsvarande for hydrogen.

Flakk-familien i Ålesund er blant dei største aksjonærane i Hexagon Composites, og har også mindre aksjepostar direkte i Hexagon Purus.

Begge selskapa er børsnotert, med hovudkontoradresse i Ålesund.

Frå kursfall til oppgang
Då børsen stengte torsdag ettermiddag var aksjekursen til Hexagon Purus 5,01 kroner, etter å ha falle nær 5,5 prosent.

Etter at børsen opna fredag skaut kursen oppover. Kring klokka 13 var Hexagon Purus-aksjen oppe i 6,76 kroner - ein oppgang på kring 35 prosent. Eit par timer før børsen stengde, var kursen 6,61 kroner.

Det verdset verdset selskapet til 1,84 milliardar - om lag 400 millionar meir enn då børsen stengde torsdag.

Før børsen opna fredag hadde kursen falle 55,03 prosent sidan starten av 2024, og har vore like over botnnoteringa på 4,93 kroner aksjen.

Då selskapet vart børsnotert i desember 2020 gjekk kursen raskt opp frå knappe 40 til over 80 kroner. Etterpå har trenden stort sett vore fallande.