I dag får dei første skattemeldinga

(NPK-NTB-Eirik Husøy): 2,8 millionar nordmenn ligg an til å få igjen i gjennomsnitt 17.000 kroner på skatten, viser førebelse tal frå Skatteetaten. Til saman utgjer dette 46,4 milliardar kroner.

Samtidig ligg 1,1 millionar nordmenn an til å få restskatt på 40.800 kroner i snitt per person, opplyser Skatteetaten i ei pressemelding. Til saman utgjer restskattbeløpet 46,9 milliardar kroner.

Frå torsdag og fram til 4. april får nordmenn tilsendt skattemeldinga puljevis. Du får beskjed på e-post eller SMS når skattemeldinga di er klar.

Skatteetaten bruker opplysningar frå mellom anna bankar, arbeidsgivarar og pensjonsutbetalarar for å førehandsutfylte skattemeldinga.

Men dei minner om at skattemeldinga ikkje er ferdig sjølv om ho er utfylt, og at alle har eit sjølvstendig ansvar for å sjekke og levere skattemeldinga.

Dette endrar folk i skattemeldinga
Ei oversikt frå Skatteetaten viser at det er enkelte opplysningar som blir endra oftare enn andre. Veldig ofte er det opplysningar som manglar, som må leggjast inn i skattemeldinga.

– Har du til dømes kjøpt eller selt bustad, investert i krypto eller utanlandske lån, må du sjølv leggje det til. Det gjeld både inntekter du skal skatte av, og frådrag som kan redusere skatten din, seier skattedirektør Nina Schanke Funnemark.

Noko av det folk endrar oftast, er:

• Renter og gjeld
• Formuesverdi for bil/køyretøy
• Reisefrådrag
• Overskot frå utleige av fast eigedom
• Foreldrefrådrag
• Virtuell valuta/krypto

Blir utbetalt før sommaren
Etter at skattemeldinga er levert, tek det vanlegvis noko tid før skatteoppgjeret er klart og ein kan få pengane utbetalte.

Dei fleste får skatteoppgjeret før sommaren, medan nokre må vente til hausten.

– Det kan vere fleire grunnar. Eksempelvis kan det vere at det manglar opplysningar i skattemeldinga di, at du har ei komplisert skattemelding, eller at du er teken ut i ein tilfeldig kontroll, forklarer Schanke Funnemark.

Leveringsfristen for skattemeldinga er 30. april for lønnstakarar og pensjonistar og 31. mai for næringsdrivande.

Om du ikkje leverer skattemeldinga innan fristen 30. april, får du skatteoppgjeret ditt tidlegast i juni.

Får du restskatt, kan du velje å betale seinast 31. mai for å sleppe renter. Om du ikkje betaler då, vil restskatten måtte betalast etter sommaren – med renter.

(©NPK)