Innspurt før Nor-Fishing

Dagen før opninga av Nor-Fishing er Sondre Raknes frå Slyngstad Reklame i Skodje i gang med å montere lys på standane til fleire utstillarar frå Møre og Romsdal. Deltakarane har samla seg i eitt større fellesstand-område.

Sjå liste over utstillarar frå Nordfjord, Sunnmøre og Romsdal t i slutten av artikkelen. Nokon som manglar? Gi oss ei melding.

Spesialistar på utstillingsstands
Raknes og kollegane reknar med å arbeide langt ut over kvelden i dag, slik at alt er klart til opninga tysdag morgon.

Slyngstad Reklame har spesialisert seg på å bygge utstillingsstands og Nor-Fishing er blant dei større oppdraga.

Koronatida var eit tid med lite aktivitet for selskapet, men frå mars i år har det vore full fart.

- Etter det blei opna opp i mars og fram til no har vi sprunge som nokre tullingar, seier dagleg leiar Robin Slyngstad.

Til saman hadde utstillarane frå Nordvestlandet samla driftsinntekter på 35 milliardar kroner i fjor. Ikkje alle dei 35 milliardane er inntekter utstillarane hentar frå fiskeri- og fiskeindustribebransjen, men nok til at dei prioriterer å vere på plass under Nor-Fishing.

Omlag 530 utstillarar frå over 20 land er med på messa, som i år ventar mellom 15.000 og 20.000 besøkande.

Første etter korona
Nor-Fishing blir arrangert annakvart år og alternerer med Nor-Aqua, som er ei messe retta mot oppdrettsbransjen.

Årets messe er den første Nor-Fishing-messa etter at koronapandemien kom og gjorde at messa i 2020 blei avlyst.

Ein konsekvens av pandemien er at ein god del av arrangementa på messa blir overført via nettet. Under Aqua Nor i 2021 var det 9150 innloggingar på nettarrangementa, og 1200 registrerte chat-samtalar mellom aktørar på messa og potensielle kundar/samarbeidspartnarar.