NPK-Peder Skjelten: Åse Kristin Ask Bakke er stortingskandidat for Arbeidarpartiet i Møre og Romsdal for første gong. Men 25-åringen frå Harøya i Ålesund kommune har allereie fleire år som politikar bak seg.

– Eg byrja tidleg i politikken. Først i ungdomskommunestyret i Sandøy kommune (som blei slått saman med Ålesund kommune i 2020, journ.anm.). Etter lengre tid i ungdomspanel og elevråd stilte eg for Arbeidarpartiet i kommunevalet i Sandøy i 2015 og blei valt inn i kommunestyret som varaordførar, fortel Ask Bakke til Nynorsk pressekontor.

Noregs yngste varaordførar

Åse Kristin var 19 år gammal då ho blei valt inn som varaordførar, og med det Noregs yngste varaordførar.

Seks år seinare er ho stortingskandidat for Arbeidarpartiet i Møre og Romsdal, men ho seier det tok tid før ho fann partiet sitt.

– Eg var med i ungdomspolitikk lenge før eg tok eit standpunkt om kva parti eg ville bli med i. Eg skjønte at eg var sosialdemokrat, men det var vanskeleg å finne eit parti eg kunne vere 100 prosent einig med. Etter kvart skjønte eg at det ikkje er mogleg å vere 100 prosent einig med eit parti, og at eg måtte velje det partiet eg var mest einig med. Sidan verdiane mine samstemmer med å vere sosialdemokrat, blei det Arbeidarpartiet.

Sjukepleiaren ønskjer heile stillingar

Samtidig som ho har vore politikar har ho også utdanna seg til sjukepleiar. To av hjartesakene hennar har utvikla seg til å dreie rundt yrket som sjukepleiar: Helse og arbeid. Ei av hjartesakene er å reversere dagens regjering si opning for fleire mellombelse stillingar.

– Det gjer meg mest forbanna. Fleire i yrket er i ufrivillige deltidsstillingar etter å ha utdanna seg til sjukepleiarar. Min generasjon blei fortalt at vi kunne velje og vrake i jobbar fordi vi har stor etterspurnad etter sjukepleiarar, men blir tilbode vikariat eller deltidsstillingar.

Stortingspolitikar

– Eg vil gjerne vere i posisjon til å få lov å bestemme og utøve politikken ein ønsker. Eg har ikkje hatt plan om å kome på Stortinget, eg begynte berre å bry meg om ting i samfunnet og jobba for å kome i kommunestyret for å få dei til. No ønsker eg å kome på Stortinget for å få til dei større tinga òg.

– Kva er ditt ønske til valet?

– Ei ny raudgrøn regjering med Arbeidarpartiet, Sp og SV. Det treng vi av fleire grunnar, blant anna for å ta klimagassutsleppa på alvor og for å betre kommuneøkonomien slik vi får tilsette fleire lærarar.