Held på distriktpsykopat-stempelet

NPK- Kjell Åsmund Sunde

I ein serie intervju presenterer Nynorsk pressekontor ulike stortingskandidatar som for første gong har moglegheit til å komme inn på Stortinget, mellom dei Stadordførar Alfred Bjørlo:

Alfred Bjørlo blei aktiv i Venstre heilt tilbake i 1987, men det er først no han stiller som stortingskandidat. Han kallar seg sjølv 100 prosent distriktsoptimist, men har òg fått tilnamnet distriktspsykopat.

– Eg er ein sentrumspolitikar. Opptatt av balanse mellom det private og det offentlege. Miljø og natur er viktigare enn mykje, og difor har eg aldri vurdert noko anna parti enn Venstre, seier Alfred Bjørlo til Nynorsk pressekontor.

Bjørlo er busett på Eid i Stad kommune. Ei bygd som nærmast har blitt ein bastion for partiet Venstre. Bjørlo har vore både lokal- og regionalpolitikar i ei årrekkje, men det er først no han stiller som stortingskandidat.

– Eg blei med i Unge Venstre allereie då eg var ein 15–16 år og gjekk siste året på ungdomsskulen, fortel Bjørlo.

Miljøsaka engasjerte

Hovudsakleg var det to grunnar til at det Bjørlo blei Venstre-politikar. Den eine var at det var eit stort Unge Venstre-miljø på Eid. Den andre grunnen var miljøsaka.

– Dette var heilt tilbake i 1987. Det var to år etter at Venstre hadde falle heilt ut av Stortinget etter 100 år. Då begynte Venstre for alvor å jobbe for miljøsaka, som eigentleg det einaste partiet då. Dei sette i gang ein stor kampanje for å få stoppa bygginga av eit attvinningsanlegg for atomavfall i Dounreay i Skottland. Målet var å stoppe planane om at engelskmennene skulle dumpe driten ut i Nordsjøen slik at det kom over til vår kyst, mimrar Bjørlo.

Miljøsaka har òg vore ein viktig faktor for han seinare i den politiske karrieren.

– Skal vi få fart på den grøne omstillinga av samfunnet, så må nyskaping i næringslivet vere drivaren. Vi må skape arbeidsplassar og lønnsemd. Vi må skape jobbar, samstundes som vi set tøffe miljøkrav og sluttar med olje. Difor er Venstre det beste miljøpartiet.

Grøn vekst

Bjørlo trur ikkje ein kan få til ei effektiv grøn omstilling og samstundes vere skeptisk til å tene pengar.

– Det er eit uttrykk som heiter at ein ikkje kan ha grøn omstilling med ei raud botnlinje. Dei andre miljøpartia ute på venstresida er skeptiske til det å tene pengar og starte bedrifter, og vil helst skattleggje så mykje som mogleg. Venstre har kombinasjonen av å vere tøffe på miljø og samstundes ha ein offensiv og god næringspolitikk.

Nordfjordingen er òg klar på at ein må skilje mellom vekst og forbruk.

– Forbruk i klassisk forstand betyr mest mogleg ting. Det må det kuttast i. Det må bli meir gjenbruk. Vi må slutte å sløse med naturressursar. Samstundes går verdiskapinga meir og meir i retning av avansert teknologi og tenesteproduksjon. Slik kan ein auke inntektene til samfunnet og likevel vere grøne og miljøvennelege, seier han.

100 prosent distriktsoptimist

Også distriktspolitikken er viktig for Bjørlo. I ein artikkel på nettsidene til Venstre karakteriserer han seg sjølv som 100 prosent distriktsoptimist.

– Kva betyr det å vere 100 prosent distriktsoptimist?

– Eg opplever at det er eit utruleg trykk i næringslivet i distrikta. Det er enormt mykje spennande som skjer. Både knytt til fiskeri og havbruk, reiseliv og teknologiske bedrifter i ulike spekter. Så når vi skal over til noko nytt etter oljen, så ligg mange av desse nye arbeidsplassane knytt til naturressursar ute i distrikta, svarer førstekandidat Bjørlo.

Samstundes peikar han på at korona kan ha gitt distrikta ein ekstra boost.

– Under pandemien har mange i oppdaga at det går an å jobbe digitalt og at ein ikkje alltid må reise til Oslo eller andre storbyar for å finne draumejobben eller ta utdanning. Det er ein av grunnane til at eg er meir optimist enn nokon gong. Gjennom korona har vi knekt nokre av dei gammaldagse måtane å organisere utdanning og arbeidsliv på, som har vore veldig sentraliserande, understrekar Bjørlo.

Vil ikkje vere rikspsykopat

Tidlegare Venstre-leiar Trine Skei Grande skal ved fleire anledningar ha kalla Bjørlo for distriktspsykopat. Ei nemning Bjørlo bokstaveleg talt trykte til sitt eige bryst ved å lage seg ein genser med påskrifta #distriktspsykopat.

– Er du klar for å gå frå å vere distriktspsykopat til rikspsykopat, dersom du kjem inn på Stortinget?

– Nei då vil eg heilt klart føretrekkje å framleis vere distriktspsykopat. Ei nemning eg lever heilt godt med, avslutta Bjørlo og ler høgt.