Klesbutikk på Devoldfabrikken konkurs

Møre og Romsdal tingrett opna tysdag konkurs i selskapet Anto Klede i Langevåg.

Selskapet blei starta i 2013, og har drive butikk ved Devoldfabrikken.

Ifølgje rettspapira hadde selskapet ei gjeld på kring 1,45 millionar kroner, opplyser bustyrar Øystein Remme til Nett No.

Verdiane som består av varelageret, er anslått til kring 400.000 kroner.

Remme hadde eit innleiande møte med styreleiar tysdag og har fått opplyst at svikt i omsetninga ligg til grunn for avgjerda om å melde oppbod.

– Samanlikna med tilsvarande periode i fjor, har dei hatt kring 30 prosent lågare omsetning i år, seier bustyraren.

Konkursen blei opna same dag som kommunestyret i Sula var samla for å ta stilling til Sulagondolen. Eitt av argumenta for at Flakk Gruppen vil bygge gondol, har vore synkande aktivitet ved Devoldfabrikken.

Fekk minustal i 2023
Klesbutikken stengte dørene måndag, og vil halde stengt om det ikkje melder seg nokon til å ta over buet.

Selskapet hadde fem tilsette, og fire av desse jobba deltid.

Butikken omsette for drygt 4,5 millionar kroner i 2021 og 2022, som er dei siste åra det er levert rekneskap for. Begge åra enda med overskot. Ifølgje Remme viser rekneskapen for 2023 minustal.

Første skiftesamling er planlagt 23. september.