Kongsberg veks vidare

Auken i ordreinngangen for Kongsberg Maritime er på nesten 46 prosent samanlikna med 1. kvartal i 2021. Veksten kjem spesielt frå nybyggingsmarknaden, skriv selskapet i kvartalsrapporten for 1. kvartal 2022.

Les børsmelding her

Kongsberg Martime er det største datterselskapet i Kongsberg Gruppen og omfattar mellom anna verksemdene på Nordvestlandet som tidlegare var eigd av Rolls Royce-konsernet. Konsernet har anlegg og kontor i Brattvåg, Ålesund, Hareid og Ulsteinvik.

Sjå resultatpresentasjonen direkte klokka 08:15, eller i opptak seinare

Nye oppdrag gjer at ordrereserven veks. Kongsberg Maritime hadde ein ordrereserve på 14,5 milliardar kroner ved utgangen av 1. kvartal i år mot 11,5 milliardar ved utgangen av 1. kvartal 2021 og 13 milliardar kroner ved utgangen av 2021. Ordrereserven er verdien av inngåtte kontraktar som er under planlegging eller i arbeid.

113 millionar i bonus
I første kvartal delte Kongsberg Gruppen ut 113 millionar kroner til dei tilsette, for "belastningen og den særdeles gode innsatsen gjennom pandemien".

Konsernet sette også av 69 millionar som tapt "knyttet til kundeforhold som er berørt av sanksjonene mot Russland", ifølgje kvartalsrapporten.

Prisauke og lange leveringstider
Dyrare råvarer og uvisse om leveringstider gjer at konsernet tenkjer nytt:

"De økte råvareprisene påvirker blant annet kostnadene ved produksjon av propeller. Vi følger situasjonen tett og iverksetter tiltak kontinuerlig. Vi ser blant annet på redesign og bruk av alternative leverandører. De økte råvareprisene kan også påvirke etterspørselen etter nye fartøy. Den utfordrende råvare-, logistikk- og komponentsituasjonen vil gi svingninger i inntektene de kommende kvartalene, seier konsernsjef Geir Håøy i kvartalsrapporten.