Konkurssak mot Golden Energy-selskap avlyst

Ein og ein halv time før Skatteetaten og managementselskapet Golden Energy Offshore Management skulle møtest i retten måndag vart konkurssaka avlyst.

Møre og Romsdal tingrett hadde sett av ein halv time frå klokke 10 for å handsame kravet frå Skatteetaten mot managementselskapet.

Retten opplyser at saka er avlyst og at det vil kome ei avgjerd frå dommaren i dag, eller i morgon. Ut over det gir ikkje retten opplysningar om kva som er årsaka til at saka er avlyst.

Ingen av partane har opplyst kva som er årsaka til konkurskravet frå Skatteetaten.

Golden Energy Offshore Management hadde 21,2 millionar kroner i driftsinntekter og ein million kroner i resultat før skatt i 2021.

Selskapet er eigd av Golden Energy Offshore Management Holding som i sin tur er eigd av det utanlandske selskapet Sakashita Co Ltd (85%) og Famar Shipping (15 prosent) - eit selskap eigd av Per Ivar Fagervoll og hans familie.