Mandag 28. oktober er det sett av 30 minutt i Møre og Romsdal tingrett for å ta stilling til ei konkursbegjæring mot skipsmeklarselskapet Atlantic Marine i Ålesund, går det fram av berammingslista til retten.
Det er Stormfuglen Holding som har begjært Atlantic Marine konkurs. Det stadfestar Stormfuglen Holding sin advokat, Ulf Henning Sørdal.
Søsterne Eva Toril Strand og Dagny Elisabeth Strand Bachmann sitt selskap Stormfuglen Holding fekk tidlegare i år medhald i erstatningskravet mot Atlantic Marine og dagleg leiar Kåre Sindre Nyvoll etter salet av fiskebåten Stormfuglen. Søstrene meinte Atlantic Marine og Nyvoll hadde handtert salet på ein slik måte at dei gjekk glipp fleire millionar kroner.
Det var både tingretten og lagmannsretten samd i.
Dommen i lagmannsretten 23. februar i år påla Atlantic Marine å betale 24 millionar kroner i erstatning, der Nyvoll var solidarisk ansvarleg for fem av millionane. Det er dette kravet som er årsaka tilkonkursbegjæringa.
Tapt eigenkapital
Atlantic Marine anka til Høgsterett, men fekk ikkje saka opp der. Dermed vart dommen frå lagmannsretten rettskraftig.
I ei oppdatert årsmelding datert 16. september i år skriv Atlantic Marine at selskapet etter dommen har ein betydeleg negativ eigenkapital og at "det er ikke lenger grunnlag for fortsatt drift og selskapet vil da måtte avvikles. Beslutningen om avvikling er pr dags dato satt på vent i forbindelse med motparten om muligheten for en minnelig ordning. Driften og inntjeningen i 2023 og hittil i 2024 har vært hemmet av den situasjonen som har vært. Styrets konklusjon er derfor at det ikke er grunnlag for fortsatt drift med mindre det oppnås enighet om en minnelig ordning."

Kan forhandle vidare
Om det skal opnast konkurs i Atlantic Marine skal først avgjerast i retten møtes 28. oktober.
Partane kan forhandle vidare om ei eventuell løysing, også fram til inn i rettsaka som skal behandle konkursbegjæringa.
Atlantic Marine har spesialisert seg på fiskebåtar og kvotar. Selskapet er eigd av Nyvoll og partnaren Stig Helge Vang. Dei er eigarar gjennom kvart sitt selskap.
I 2022 hadde selskapet 25 millionar kroner i driftsinntekt og 19 millionar kroner i resultat før skatt. I 2023 var inntekta ni millionar kroner og resultatet før skatt minus 24 millionar kroner.
I mars i år vart selskapet Amarine Shipbrokers registrert i Brønnøysundregisteret, med Stig Helge Vang som dagleg leiar og eigar av 50 prosent av aksjane gjennom selskapet SHV Invest. Den andre aksjonæren er Carina Dyb Nyvoll, ifølgje databasen Proff.no.
Ikkje første konkursvarsel
Ifølgje dommen i lagmannsretten kan usemje om storleiken på honoraret til Atlantic Marine vere den utløyseande årsaken til striden mellom Stormfuglen Holding og Atlantic Marine. Skipsmeklerselskapet meinte det ikkje hadde fått den avtalte betalinga, og truet Stormfuglen Holding med konkurs.
"Tvisten mellom partene synes utløst av meglerens forsøk på å innkassere den resterende kommisjonen på MNOK 1,85, endog med forkynnelse av konkursvarsel.", heiter det i dommen frå lagmannsretten.
Publisert: 03.10.2024 15:23
Sist oppdatert: 03.10.2024 17:05