Lokalt reiarlag overtek Sanco-skip

Sea Shipping har nyleg overteke seismikkfartøyet Sanco Atlantic. Det inneberer at reiarlaget med base i Ulsteinvik snart vil ha sju skip i flåten. 

Det nyaste tilskotet – som inntil slutten av 2025 opererte i seismikkmarknaden – skal no byggjast om ved Green Yard Kleven. 

Skipet har allereie vore til kai ved verftet ei periode.

– Seismikkfartøy er robuste og fleksible kvalitetsplattformar og svært godt eigna for vidareutvikling mot subsea- og fornybarmarknadene. Med Atlantic styrker vi både kapasiteten og posisjonen vår inn mot havbotn-operasjonar, seier administrerande direktør Jarle-Petter Jøsok i Sea Shipping til Nett No. 

Herøyværingen er administrerande direktør og grunnleggjar av reiarlaget, som blei etablert i 2020.

Etablerer teknologihub
Samtidig som Sea Shipping utvidar flåten tek reiarlaget initiativ til å etablere teknologihub-en Sub Tech. Den skal fungere som ein test- og utviklingsarena for leverandørar og operatørar innan havbotnsteknologi

Jøsok fortel at målet er å kople industrien og kundane tettare saman.

– Sub Tech blir ein viktig motor for innovasjon. Her skapar vi eit samlingspunkt for teknologiaktørar som ønsker å utvikle, prøve ut og ta i bruk nye løysingar for havbotnsoperasjonar, legg han til. 

Har bygd om nok eit skip
91 meter lange Sanco Atlantic blei opphavleg bygd i 1987, og blei omgjort til seismikkskip på 1990-talet. Når skipet er klart frå Green Yard Kleven skal det ut i arbeid.

Fem av skipa til reiarlaget er i full drift og gjer subsea-oppdrag for anerkjente kundar i Nordsjøen, opplyser selskapet.

Fleirfunksjonsskipet Saturn har vore inne til ombygging ved Green Yard Kleven. Fartøyet nærmar seg levering og vil snart inngå i Sea Shipping si flåte. 

Skipet som er basert på det klassiske UT 755L-designet, har gått gjennom ei omfattande oppgradering. Det er også måla gul, som dei andre skipa til reiarlaget. 

Nærare 200 tilsette
Nett No omtala i fjor korleis Sea Shipping har bygd om fleire offshoreskip, til oppdrag i fornybarmarknaden. 

Veksten har ført til at reiarlaget no har nærare 200 tilsette i arbeid.

– Vårt fokus er alltid klart: Å levere trygge, effektive og berekraftige operasjonar for kundane våre. Veksten vi no opplever er eit resultat av langsiktig arbeid, høg kompetanse og tillit frå marknaden, seier driftsdirektør Karl Erik Sande.