Maritime Partner treng fleire folk

I dag offentleggjorde Maritime Partner og Hofseth Aqua ein kontrakt på ein heilelektrisk 11,8 meter lang passasjerbåt til i overkant av seks millionar kroner.

Båten skal drivast av reiselivselskapet Uteguidens si avdeling i Valldal. Den skal først og fremst frakte passasjerar til Hofseth Aqua sitt visningsanlegg ved Vindsneset i Fjord Kommune, og også brukast til andre oppdrag i Uteguiden-regi.

220 millionar kroner
I løpet av andre halvår i fjor og fram til no har Maritime Partner i Brevika i Ålesund auka ordrereserve, til 220 millionar kroner.

27 båtar skal leverast frå selskapet i løpet av 2022 og dagleg leiar og medeigar Peder R. Myklebust seier selskapet arbeider med fleire prosjekt som kan bli nye kontraktar.

- Veldig mange interessante ting pågår, seier Myklebust.

Meir folk
I dag har selskapet rundt 44 tilsette, i tillegg til innleigde. Det er ikkje nok, med den oppdragsmengda Maritime Partner har og reknar med å få.

- No ser vi oss om etter gode folk å tilsette, seier Myklebust.

Tøft år
Båtbyggaren i Breivika i Ålesund gjekk med underskot for sjette år på rad i 2020. Det blei "et lavere aktivitetsnivå enn forventet", skriv selskapet i årsmeldinga for 2020. Grunnen til det reduserte aktivitetsnivået var konsekvensane av koronapandemien.

Maritim Partner byggjer arbeidsbåtar for offshorereiarar og oljebransjen, for oppdrettsnæringa og hamnevesen og båtar til ambulanseteneste, og brannvernbåtar, sightseeingsbåtar og båtar til militæret.