Maritimt oppsving for Hovdenakk Maskinering

Når dei store maritime industribedriftene har bra med oppdrag får også dagleg leiar og hovudaksjonær Kjetil Hovdenakk og kollegaene det travelt.

I fjor sette selskapet inntektsrekord for andre år på rad og fekk eit resultat før skatt tilsvarande 13,4 prosent av driftsinntekta.

- Det er i alle fall ikkje mindre å gjere, seier Kjetil Hovdenakk om utviklinga så langt i 2024.

Treng fleire folk
Brunvoll-konsernet er ein stor kunde, som har meldt om nye kontraktar på rekke og rad i år. Det merkar Hovdenakk godt, og selskapet er no på jakt etter ein tilsett til, slik at arbeidstokken veks til seks.

I fjor tilsette bedrifta også ein lærling for første gang og har byrja å vurdere utviding av bygget.

Familieigd
Dreia og fresa metalldelar, der nøyaktigheita blir målt i 100-dels millimeter, er spesialiteten til selskapet.

Selskapet Hovdenakk Maskinering blei skipa av Olav Harald Hovdenakk i 2014, etter har han hadde drive med maskineringsverksemd sidan 1997. I dag er selskapet eigd av barna, dagleg leier Kjetil Hovdenakk (50,2 prosent), Anja-Olsen Hovdenakk (24,9 prosent) og Eva Hovdenakk Eriksen (24,9 prosent.)

Olav Harald Hovdenakk starta heime i reiskapshuset i 1997, samstundes som har dreiv gard og jobba i industrien. I 2002 avvikla han gardsdrifta og sa nokre år etter også opp hos Rolls-Royce, og satsa på heiltid.