Millionar på spel i strid om hotellutsikt

Ålesundregionens Havnevesen har sjølv berekna at det ville ha tapt mellom 15 og 20 millionar kroner i 2022 dersom det ikkje kunne fortøye to store cruiseskip samstundes på sørsida av Ålesund sentrum.

Det kom fram i innleiingsforedraget til advokat Andreas Stang Lund i retten måndag. Han representerer saksøkjaren, Strandgaten Brygge.

Anslaget illustrerer kva som står på spel for havnevesenet i rettsaka denne veka.

Krev forbod
Strandgaten Brygge, som eig Waterfront Hotel-bygget, har gått til sak mot eigarane av Ålesundregionens Havnevesen. Hovudkravet er at Ålesundregionens Havnevesen ikkje kan fortøye slik at cruiseskip stikk inn på eigedomselskapet sin eigedom og framfor hotellet.

Vinn Strandgaten Brygge fram med søksmålet er det ikkje plass til to av dei største cruiseskipa samstundes på sørsida av Ålesund sentrum.

Stor vekst
Ålesund har hatt ein stor vekst i cruisetrafikken og har blitt ei av Noregs største cruisehamner.

I fjor kom 282 cruiseskip til Ålesund. 147 av dei var over 250 meter lange. I år er det venta 168 skip i den storleiken til Ålesund.

Til samanlikning var det berre 26 av cruiseskipa som kom til Ålesund i 2011 som var over 250 meter lange.

Hamnefogd Ole Christian Fiskaa i Ålesundregionen Havnevesen anslår til Nett No at det årleg er snakk om 100 - 120 besøk av to store cruiseskip på same dag i løpet av eit år. Han oppjusterer óg anslaget for tapte inntekter i 2022 til opptil 30 millionar kroner, dersom det ikke hadde vore høve til å fortøye to store cruiseskip samstundes.

Misnøgde gjestar
For Waterfront Hotel er cruiseskip framfor hotellet ei ulempe som både gir misnøgde gjestar og tap av omdømme. I tillegg avgrensar det sterkt bruken av sjøarealet framfor eigedommen.

Den vesle småbåthamna ved hotellet kan ikkje brukast, og hotellet har heller ikkje fått lov å sette opp ei badstove ved sjøen.

Usamde om avtale
Ein avtale frå 2009 er sentral for begge partar og gjeld bruk og rettar knytt til arealet til Strandgaten Brygge og sjøområde utanfor eigedomen. Men dei tolkar avtalen stikk motsett.

Ålesundregionen Havnevesen tolkar avtalen slik at det har rett til å fortøye som i dag.

Strandgaten Brygge meiner avtalen ikkje gir hamnevesenet rett til å fortøye slik som i dag, og at hamnevesenet også forsto av avtalen avgrensa bruken av arealet vest for cruisekaia Prestebrygga.