Mohn over 10 prosent i Fjord1

Gjennom investeringselskapet Perestroika har Mohn kjøpt 377.260 aksjar i Fjord1 og eig no 10,36 prosent av aksjane i det børsnoterte ferjereiarlaget.
Frå før eigde Perestroika 7,76 prosent av aksjane.

Trekte seg frå styret

Ved å eige over 10 prosent av aksjane sikrar Mohn seg mot ei eventuell tvangsutløysing i Fjord1.
Mohn trekte seg frå styret i Fjord1 i desember 2019 etter at majoritetseigaren, Sævikfamiliens selskap Havilafjord og Havilafjord Holding, kjøpte seg opp frå 51 prosent eigarskap til å eige 66,5 prosent av selskapet. I partnerskap med amerikanske Vision Ridge Partners kontrollerer Sævikfamilien og det amerikanske selskapet 70,35 prosent av aksjane i Fjord1.

Kjøpt seg gradvis opp

Etter at Mohn trekte seg frå styret har han kjøpt seg gradvis opp i selskapet.
I dag er Fjord1-aksjen handla til mellom 36,90 og 37 kroner pr. aksje. Då Mohn trekte seg frå styret sa han at han meinte selskapet var verdt meir enn 45 kroner pr. aksje, som var prisen Havila og Vision Rigde Partners betalte for å kjøpe seg opp.

Prisen Sævikfamilien/Vision Rigde Partners betalte verdsette Fjord1 til 4,5 milliardar kroner. Dagen kurs verdset selskapet til omlag 3,7 milliardar kroner.

Topp i 2018

Ved børsnotering sommaren 2017 blei Fjord1 verdsett til 31,50 kroner pr. aksje.
Den førebelse toppen for aksjen blei nådd 31. mai 2018, med 55 kroner pr. aksje. Deretter har det gått nedover i rykk og napp, til 33,65 kroner pr. aksje 18. november i 2019.
Havilafjord-eigar Havila Holding eig 33,34 prosent av aksjane i Bakkar og Berg Media, som gir ut NETT NO.