Nesten reint H/Frp-fleirtal

NPK_NTB: Frp går fram med 3,5 prosentpoeng på ei ny stortingsmåling. Saman med Høgre er dei fire mandat unna å få fleirtal på Stortinget.

Med ei oppslutning på 20,3 prosent gjer Frp si beste Opinion-måling sidan april 2011. Målinga er laga på oppdrag for Altinget og ABC Nyheter.

Frps framgang er også den einaste endringa som er utanfor feilmarginen på målinga. Dei er også større enn Ap, som fell til 18,5 prosent. Viss målinga hadde vorte valresultatet, hadde Høgre og Frp til saman fått 81 mandat. Det er fire mandat unna det ein treng for fleirtal.

Opnar for Listhaug
Førsteamanuensis Svein Erik Tuastad ved Universitetet i Stavanger meiner målinga kan tyde på ein ny dynamikk i norsk politikk.

Han seier at det ikkje lenger er utenkjeleg at Sylvi Listhaug kan bli statsminister i Noreg.

– Dersom Høgre og Frp får fleirtal åleine og Frp blir størst, vil Frp kunne krevje statsministerposten. Dette er altså ikkje utenkjeleg og kan skje. Men det er meir sannsynleg viss det blir borgarleg valsiger, at Høgre blir størst, seier Tuastad til ABC Nyheter.

Hentar Sp- og Høgreveljarar
Johan Giertsen i nettstaden Poll of polls seier til Altinget at Frps suksess særleg kjem av at dei hentar mange veljarar frå Senterpartiet og Høgre.

Dette er resultatet av målinga: Raudt: 7,0 (+0,3), SV: 8,1 (-0,7), Ap: 18,5 (-2,6), Sp: 5,9 (0,0), MDG: 3,5 (+0,3), KrF: 3,6 (+1,1), Venstre: 6,0 (+0,4), Høgre: 23,6 (-1,8), Frp: 20,3 (+3,5), INP: 1,6 (+0,2) Andre: 1,9 (-0,9).

Målinga er gjennomført mellom 23. og 30. september blant 1000 respondentar. 704 av dei har svart på partipreferanse. Feilmarginen er på mellom 1,0 og 3,1 prosentpoeng.