Nordfjordindustrien på lærlingjakt

- Viss vi går tilbake til 2015-2016 var utfordringa innan industrien at det var får lite læreplassar. No er det ikke læreplassar, men mangel på lærlingar som er utfordringa, seier dagleg leiar Tor-Øyvin Solheim i Nordfjord Opplæringskontor, som organiserer lærlingutdanning på 27 fagfelt i Nordfjord.
I industrien har det skjedd ei markert haldningsendring i favør av å satse på lærlingar. Ein aldrande arbeidsstokk hos ein del bedrifter og ei erkjenning av at det er blitt vansklegare å rekruttere frå utlandet er grunnen til at fleire no satsar på lærlingar, etter Solheim si vurdering.

Strategisk satsing

Alt i 2015 bestemte vindusprodusenten Nordvestvinduet i Almenningen i Kinn kommune seg for at den viktigaste måten for å rekruttere ny arbeideskraft var å satse på lærlingar.
Nett no er tre av ein arbeidsstokk på 87 lærlingar. Etter sommaren håpar dagleg leiar Rune Sætren å vere opp i fem, og seier målet er å ligge på mellom fire og seks lærlingar.
Satsing på lærlingar inneber mellom anna å vise seg fram for og møte elevar for å få dei til å velje yrkesfag, og for Nordvestvinduet sitt vedkomande, utdanne seg til CNC-operatørar for trebearbeidingsindustrien. No er Sætren og andre frå bedrifta ute på skular rundt fire gangar i året.
- Vår bransje har vore sløv for lenge, seier Sætren om trebearbeidingsindustriens rekrutteringsarbeid tidlegare.

Rekordår

I fjor sette Nordvestvinduet ny omsetningsrekord, med 123,5 millionar kroner, opp frå 108,4 millionar kroner i 2018, og betra lønsemda (sjå tabell).
- I fjor traff ting slik vi hadde tenkt, seier Sætren.
Også 2020 har starta bra.
- Det er berre fjoråret som starta betre enn i år, seier Sætren.
Så langt har koronakrisa råka selskapet i liten grad. Uvissa no er knytt til at nedgangen i igangsetting av nye bygg i april vil gjenta seg også i mai og juni, seier Sætren.