Nullvekst i fastlandsøkonomien

(NPK-NTB): BNP i Fastlands-Noreg voks med svake 0,1 prosent i andre kvartal, ifølgje SSB. Men på norsk sokkel var det høg aktivitet.

– Veksten i fastlandsøkonomien har vore uvanleg svak det siste året, og denne utviklinga heldt fram i andre kvartal 2024, seier Pål Sletten, seksjonssjef for nasjonalrekneskapen i Statistisk sentralbyrå (SSB).

Mellom anna bidrog nedgang i tradisjonelt fiske til å dempe BNP i Fastlands-Noreg i andre kvartal. Dette blir forklart med at fangstkvotane har vorte reduserte på viktige fiskeartar.

På motsett side bidrog mellom anna varehandel og kraftforsyning med å trekkje opp veksten.

Vekst i olje og gass
Ute på sokkelen har det likevel vore auka aktivitet.

Sesong- og kalenderjustert volum i olje- og gassutvinning voks 5,6 prosent i andre kvartal i år, og gassproduksjonen var høg for årstida.

– Høg aktivitet i utvinningsnæringa førte til at samla BNP, medrekna petroleumsverksemd og utanriks sjøfart, voks 1,4 prosent, skriv SSB.

Førebelse tal viser at talet på sysselsette utvikla seg flatt frå første til andre kvartal.

Økonom: – Olje og gass reddar økonomien
Sjeføkonom Kyrre M. Knudsen i Sparebank 1 SR-Bank, meiner det er olja som reddar norsk økonomi for tida.

– Den dempa utviklinga held fram dette kvartalet. Hadde det ikkje vore for olje og gass, hadde vi hatt ein nedgang i norsk økonomi og fare for resesjon, seier han.

– Det er altså olje og gass som reddar økonomien no, seier han.

Han tviler likevel på at dei svake BNP-tala er eit signal om at økonomien vil slite framover.

– Vi ser likevel framoverskodande undersøkingar at veksten er i ferd med å ta seg opp og at forbruk og investeringar vil auke, seier han.