Ny motbør for Stordal-satsing

I juni 2019 fekk Norsk Sjømat på Stranda tildelt ein såkalla visningskonsesjon i Stordal, som kan gi kommunen etterlengta arbeidsplassar.

No er det Fylkesmannen i Møre og Romdal som seier stopp, fordi Stordal kommune manglar ein overordna plan etter plan- og bygningslova, som set rammer for akvakulturanlegg i kommunen. Dispensasjonen som Stordal kommune har gitt for å etablerer anlegg i fjorden held ikkje, meiner fylkesmannen.
Stordal kommune vedtok tidleg i desember at den står på sitt og ber Fylkesmannen trekkje sin klage på dispensasjonen.

Lang ferd mot målet

Planen til Norsk Sjømat er å la smolten vekse opp i tankar på land, i ein nedlagt møbelfabrikk, før den blir sett ut i anlegg i sjøen. Norsk Sjømat søkte først om ein utviklingskonsesjon, ein konsesjon som blir gitt til selskap som utviklar nye metodar for lakseoppdrett - mellom anna for å redusere problem med lakselus og rømming.
Den søknanden blei avslått, men Norsk Sjømat søkt også om ein visningskonsesjon.
Ein visningskonsesjon er ein rett til å bygge eit oppdrettsanlegg som er ope for publikum, der folk kan få sjå korleis oppdrettsverksemda blir drive. Visningskonsesjonar er gratis. Hausten 2017 avslo Fiskeridirektoratet søknaden, men i juni 2019 avgjorde Nærings- og fiskeridepartementet Norsk Sjømat skulle få visningskonsesjonen likevel.

Nye arbeidsplassar

Dei opphavlege planane for Norsk Sjømat i Stordal var investeringar på 400-500 millionar kroner og 50-60 nye arbeidsplassar.
At selskapet fekk ein visningskonsesjon i staden for ein utviklingskonsesjon betyr at dei opphavlege planane blir redusert, men at det likevel er snakk om store investeringar og fleire arbeidsplassar.