NPK-NTB-Kenneth Kandolf Haug: Noreg eksporterte sjømat for 12,8 milliardar kroner i februar. Det er rekord, samtidig som volumet av sjømat som blir eksportert blir stadig mindre.

Verdien av eksporten er ein auke på 1,6 milliardar kroner, eller 14 prosent, frå same månad i fjor, skriv Noregs sjømatråd i ei pressemelding.

– Trass i krig og uro i verda har den norske sjømateksporten hatt ein verdimessig god start på året, drive av høg prisvekst og ei svak norsk krone. Volumet har likevel falle seks månader på rad, og vi må heilt tilbake til 2006 for å finne ein februar månad med lågare eksportvolum av norsk sjømat, seier administrerande direktør Christian Chramer.

Mindre sjømat blir eksportert
Samtidig vart det berre eksportert 207.000 tonn sjømat førre månad. Det er ein nedgang på 17 prosent samanlikna med same månad i fjor.

Mellom anna kjem dette av lågare kvotar, dårleg vêr, og lågare slaktevolum. For den asiatiske marknaden har det også vore eit problem at det kostar meir å frakte norsk sjømat dit, på grunn av stengt luftrom over Russland.

Volumnedgangen påverka den totale eksportverdien i februar negativt med om lag 600 millionar kroner, ifølgje Sjømatrådets berekningar.

Vekst i Kina
Som i januar er det USA som er den største marknaden for norsk sjømat, og heile 10 prosent av sjømaten hamna der. Noreg eksporterte 17 prosent meir sjømat til USA i februar 2023 enn same månad i fjor, og verdien auka med 56 prosent.

Polen og Danmark var dei nest største og tredje største marknadene. Trass problema i Asia gjer norsk sjømat også stor framgang i Kina.

– Kina har lagt koronapandemien bak seg, og det er ein sterk etterspurnad etter fersk laks. Det ligg derfor an til ei spennande fortsetjing i marknaden, seier Noregs sjømatråds utsending til Kina, Andreas Thorud.

– Vi går glipp av stor aktivitet
Sjømat Noreg, som er landsforeininga for fiskeri- og havbruksnæringa, meiner Noreg går glipp av stor aktivitet langs kysten ved at for mykje uforedla fisk blir send ut av landet.

– Utfordringa er å gjere meir med fisken her i Noreg. Vi bør ha større ambisjonar for norsk verdiskaping enn å leggje ein uforedla fisk i ei kasse, frosen eller fersk, og så selje den hælen til kundar i heile verda, seier direktør for industri i Sjømat Norge, Stine Akselsen i ei pressemelding.

– All den fisken vi sender ut uforedla inneheld viktig restråstoff som norsk sjømatindustri kunne nyttiggjort. I staden blir dette restråstoffet til eit miljø- og avfallsproblem for kundar som ikkje har apparat for å handtere slikt, seier Akselsen.