Nye kostnadskutt hos Hexagon Purus

Då Hexagon Purus la fram kvartalsrapporten per 4. kvartal 2024 fortalde selskapet at det skulle kutte kostnadane med 200 millionar kroner og seie opp 15 prosent av dei tilsette.

I kvartalrapporten for 1. kvartal 2025 varslar selskapet nye kostnadskutt.

"Kostnadsreduksjonsprogrammet som vi lanserte i februar er gjennomført, men vi siktar no mot ytterlegare kostnadsreduksjonar som hovedsakleg vil påvirke drifta vår i Tyskland.", skriv administrerande direktør Morten Holum i Hexagon Purus i kvartalsrapporten.

Les børsmelding her

Trump-effekt
Hexagon Purus lagar tankar og system for bruk av hydrogen som energiberar, i alt frå større køyrety til tog og skip. I tillegg leverer selskapet og batterisystem. Hovudkontoradressa er i Ålesund, men produksjonen forgår i Nord-Amerika og Tyskland. 

Då selskapet vart skilt ut frå hovuaksjonæren Hexagon Composites og børsnotert i 2020 segla hydrogenselskap i ein politisk medvind. Om hydrogen blir produsert av fornybar energi er det ein energiberar som ikkje gir CO2-utslepp. 

Den vinden har snudd, og vart til kraftig motvind med Donald Trump sitt comeback som president i USA i januar i år. Sidan har det berre blitt verre, sett frå Hexagon Purus sin ståstad:

"Skiftet i politikk hos den nye amerikanske administrasjonen har lagt til nye utfordringar, både på den geopolitiske fronten og for den globale handelen. Spesielt den betydelege auken i tollen som USA har annonsert mot alle sine  handelspartnare har vore eit sjokk for global handel og skapt uro i finansmarknaden. Det er framleis for tidleg å seie kva som blir dei langsiktige effektane av tollsatsane for dei  det globale verdikjedene og kundane sin etterspørsel, men den umiddelbare verkanden er at aktørane synes det er vanskeleg å ta langsiktige investeringsbeslutningar. Dette er påverkar både våre kundar og vår verksemd negativt", skriv Holum i kvartalsrapporten.

Inntektene ned 44 prosent
Samanlikna med første kvartal 2024 er inntektene til Hexagon Purus ned 44 prosent i første kvartal i år, til 230 millionar kroner. Samstundes er både underskotet på drifta og underskotet før skatt meir enn dobla sidan same kvartal i fjor (sjå tabell).

Selskapet ventar ein svak marknad for hydrogentankane og - systema sine i resten av 2025.

Hexagon Purus vart skilt ut av Hexagon Composites og børsnotert i 2020. Hexagon Composites lagar tankar og system for bruk av natur- og biogass som energikjelde og har Flakk-familien i Ålesund som ein av dei større aksjonærane.