Nær rekordår for Ørsta-entreprenør

Anleggsservice Ørsta var berre nokre tusen kroner frå rekordomsetning i fjor, ifølgje årsrapporten som nyleg blei offentleg.

Selskapet driv entreprenørverksemd med maskinar, steinarbeid, muring og flislegging. Dei tek mellom anna på seg oppdrag med å opparbeide utemiljø og grave tomter og klargjere for asfaltering.

I løpet av dei siste åra har dei mellom anna utført arbeid ved uteområdet til Havila Hotel Raftevold på Grodås.

Fekk koronabrems
I årsrapporten kjem det fram at aktiviteten blei «svært redusert» etter at koronapandemien slo til. Andre halvår blei likevel så bra at dei klarte å hente inn att det tapte.

Styret og dagleg leiar Trond Eriksen seier seg nøgd med at dei klarte å levere eit resultat på nivå med året i førevegen (sjå tabell under).

Meir enn dobla omsetning sidan 2015
Entreprenørselskapet ble først etablert i 2009 under eit anna namn, men endra til dagens namn i 2015. Sidan den gong er inntektene meir enn dobla.

Resultata har heile tida vore på plussida og eigenkapitalen er auka jamt og trutt til nær 1,9 millionar ved utløpet av 2020.

Ved utløpet av 2020 hadde dei fem tilsette.