Oppdrett gir opptur

Flytting av ein større del av produksjonen til utlandet, saman med oppsving i oppdrettsmarknaden er med å løfte resultatet for Mørenot-konsernet (sjå tabell) i fjor.

Konsernet, med rundt 450 tilsette i Noreg og utlandet, lagar nøter og garn til oppdrett og fiske, og leverer mellom anna eigenutvikla deflektorar til seismikk-selskap. (Ein deflektor held kablane bak seismikkskipet frå kvarandre, etter same prinsipp som ei oterfjøl).

Best i oppdrett

I 2013 var satsinga på oppdrettsmarknaden, gjennom dotterselskapet Mørenot Aquaculture med på å trekkje konserntala ned. I fjor gjekk Mørenot Aquaculture i pluss, og i år er det den marknaden der det er lettast å ta ut best marginar, i følgje Mørenot-sjef Knut Berge.
Konsernet er mellom anna engasjert i å utvikle og produsere nøter som oppdrettselskapet Salmar skal bruke på det planlagte oppdrettsanlegget i ope farvatn.

- Det er absolutt tøffast på olje, og så er det friskast på akvakultur, seier Berge.
Han reknar med eit resultat for 2015 om lag på line med fjoråret.

Merkar strukturendringar

Pr. i dag utgjer leveransane til oljenæringa om lag 15 prosent av driftsinntektene, medan resten er delt mellom fiskeri- og oppdrett.
Medan oppdrettsnæringa både veks og gjer det godt, slår ikkje aukande lønsemd i fiskera like sterkt ut for Mørenot. Grunnen er at større kvotar blir samla på færre båtar. Då blir det færre kundar å selje til.
- Vi merkar strukturendringane, seier Berge.

Legg ned notbøteri

Mørenot har eigen fabrikk i Kina og Spania, og meir enn halvparten av arbeidsstokken i konsernet er tilsette i dei utanlandske bedriftene. Flytting av ein større del av produksjonen til utlandet er ein del av forklaringa på betra resultat i 2014.
På heimebane avviklar Mørenot notbøteriet i Ålesund og samlar verksemda ved hovudkontoret i Søvika. Den prosessen skal vere fullførd i løpet av våren 2016, i følgje Berge.