Oscar Almgren etablerer nytt reiselivsselskap

Uteguiden-grunnleggar Oscar Almgren etablerer selskapet North West DMC for å sette saman og selje pakkar med turar og opplevingar i Møre og Romsdal til turoperatørar, agentar og eventselskap i Noreg og utlandet.

Saman med seg som grunnleggarar og medeigarar i North West DMC har han Erlend K. Ringstad og Nicolas Bourdillat. Ringstad var ein av grunnleggarane av Valldal Naturopplevingar, som no er ein del av Uteguiden. Bourdillat arbeider i Uteguiden-avdelinga i Ålesund.

Det blir eit selskap som skal arbeide som Flakk Gruppens reiselivsselskap 62 Nord, men mot ein annan del av marknaden, ifølgje Almgren.

Etterspørsel
Ideen bak det nye selskapet er å koble reiseliv- og opplevingsbedrifter i Møre og Romsdal med reiselivsaktørar som sel reiser til fylket og er på jakt etter tilbod som kan lokke reisande til å ta turen.

- Vi har hatt ein tanke om dette i langt tid og har fått ganske tydlege signal om at marknaden etterspør dette. Det finnes ganske mange leverandørar (av reiseliv- og opplevingsbedrifter, red. merk) men vi ser at det er eit problem å få leverandørane ut i marknaden, seier Almgren.

Selskapet er under etablering, men marknadsarbeidet er alt i gang og det er også arbeidet med å rekruttere ein dagleg leiar.

Reindyrke
Uteguiden blei etablert som eit guideselskap som tok folk til topps på fjella på Sunnmøre sommar som vinter. Etterkvart har selskapet utvida, til mellom anna kajakkturar og elverafting.

Ønskjet om å reindyrke Uteguiden som eit opplevingsselskap er ein av grunnane til at Almgren no er med på å etablere eit nytt selskap. Der blir Uteguiden ein av fleire aktørar som det nye selskapet skal bruke som underleverandør.