Over halvparten av olja er ikkje produsert

(NPK-NTB): – Eg trur på 50 år til for olje- og gassalderen i Noreg, ja. Verda treng framleis olje og gass, seier Trond Omdal, som er direktør for investorkontakt i det norske oljeselskapet Okea til NRK.

Han viser til analysane frå det internasjonale energibyrået IEA. Dei spår at etterspurnaden etter olje og gass vil stige heilt fram til midten av 2030-talet, for så å flate ut.

Halvparten av ressursane att
Oljedirektoratet (OD) anslår at 49 prosent av dei utvinnbare ressursane på norsk sokkel er produserte, medan 24 prosent enno ikkje er funne.

I ODs siste ressursrapport , som kom i fjor, heiter det at om lag 40 prosent av dei uoppdaga ressursane ligg i område som enno ikkje er opna for petroleumsverksemd.

Olje- og energiminister Tina Bru (H) seier det er viktig og vanleg at Oljedirektoratet lagar anslag på kor mykje olje som faktisk finst.

– Vi har ikkje noko sjølvstendig mål om at vi skal hente opp alt på norsk sokkel. Det som kjem til å avgjere om ein hentar opp meir, vil jo vere at det er lønnsame ressursar som selskapa kan påvise og som dei klarer å byggje ut til ein pris som vil stå seg i marknaden, seier ho.

Støre vil ikkje kunngjere oljestopp
Arbeidarpartileiar Jonas Gahr Støre gjer det endå ein gong klart at han ikkje har tenkt å kunngjere nokon oljestopp, og han meiner det heller ikkje er nødvendig for det grøne skiftet.

– Vi er mot sluttdato. Vi har som haldning at vi skal utvikle, ikkje avvikle den industrien, for det er på skuldrene av han vi byggjer dei nye arbeidsplassane. Eit kunstig brot med sluttdato, det fjernar fagfolk, investeringar og moglegheit til å utvikle dei teknologiane vi treng, seier Støre.

(©NPK)