Pelagia-sjefen fortel om trippel-smell

Norske fiskarar får omtrent halvert  makrellkvota si neste år. Det vil industrien merke.

– Det er veldig negativt at ressursgrunnlaget er dårlegare, seier Pelagia-sjef Egil Magne Haugstad til Nett No. 

Medan fiskarane kan få heilt eller delvis kompensert for reduserte kvoter ved at prisane stig, er det tvert om for industrien. 

Bransjen opplever i staden ein trippel negativ effekt, ifølgje Haugstad: 

• Det blir mindre fisk å fordele dei faste kostnadane knytt til anlegga på.
   
• Det blir meir utfordrande å halde på dei faste tilsette, som har kompetansen som må til for å drive anlegga. 
   
• Det blir tyngre å rekruttere til høgsesongane, fordi mindre fisk betyr mindre inntekt til dei sesongtilsette. 

Skal stå i det
Pelagia-konsernet hadde 9,6 milliardar kroner i driftsinntekter og eit lite minus i årets ni første månadar i år (sjå tabell under).

Selskapet tek imot makrell på anlegga sine i Selje, Måløy og Kalvåg og Egersund.

Haugstad anslår at selskapet vil får ein inntektsreduksjon på grunn av redusert makrellfiske på omlag ein halv milliard kroner neste år.

– Pelagia har tenkt å stå i denne konkurransen, men at det blir utfordrande, er det ingen grunn til å underslå, seier han.

Fleirnasjonal avtale
Denne veka vart Noreg, Storbritannia, Færøyene og Island samde om ein avtale om kvotekutt - og fordeling av makrellfisket.

Norske fiskarar får fiske 79 tusen tonn makrell neste år. Det er omlag ei halvering samanlikna med i år. Sjømatanalytikar Finn-Arne Egeness i Nordea anslår at norske fiskarar sine inntekter frå makrellfisket blir omlag 3,4 milliardar kroner i 2026. 

I år fiska norske fiskararar for seks milliardar kroner, ifølgje Norges Sildesalgslag.