Prisauke gir eksportrekord

NPK-NTB: Noreg eksporterte sjømat for 14,4 milliardar kroner i november. Det er ein auke på 2,3 milliardar kroner, eller 19 prosent, samanlikna med november i fjor.

Så langt i år har Noreg eksportert sjømat for 138 milliardar kroner, noko som er 29,2 milliardar kroner meir enn i same periode i fjor.

– Eksportverdien i november er tidenes tredje høgaste i ein enkeltmånad og stadfestar at norsk sjømat framleis har ein sterk global posisjon, seier administrerande direktør Christian Chramer i Noregs sjømatråd.

Prisauke
Han opplyser at veksten ikkje kjem av større volum, men høgare prisar.

– Generelt har vi ein situasjon med høg matvareinflasjon og auka kostnader som dreg opp prisane i heile verdikjeda, seier Chramer.

Prisveksten stod åleine for nesten 3 milliardar kroner av den totale sjømateksporten på 14,4 milliardar kroner i november. Det var ein spesielt sterk månad for laks, aure, sei og torsk, som alle oppnådde eksportrekordar samanlikna med november i fjor, opplyser Sjømatrådet.

Sjølv om november isolert sett var ein sterk eksportmånad for laks, så blir det meldt frå marknadene om ein uroleg og uoversiktleg situasjon knytt til kontraktsmarknaden for laks i 2023, ifølgje Chramer.

– Dette går utover den føreseielegheita som norsk laks har representert for importørar, produsentar og daglegvarekjeder, seier han.

– Krevjande tider
I november vart mange av sjømatartane eksporterte i lågare volum enn for eitt år sidan, noko som gav eit fall i verdien på rundt 900 millionar kroner samanlikna med november i fjor.

– Det er krevjande tider for mange av dei villfanga artane og kategoriane våre. Høge prisar og lågare kjøpekraft i Italia er mellom anna utfordrande for tørrfisken. Etter ein god start på året opplevde vi volum- og verdifall for sild og makrell i november, så det blir neppe ny verdirekord i den pelagiske eksporten i år, seier Chramer.

Passerer truleg 150 milliardar
Viss den sterke verdiveksten i år held fram også i desember, kjem sjømateksporten til å passere 150 milliardar kroner ved utgangen av 2022. Det kjem av i stor grad laks, som i november stod for 70 prosent av den totale eksportverdien i november.

– For andre månad på rad passerte lakseeksporten 10 milliardar kroner i verdi, noko som er eit historisk høgt nivå. Etter dei elleve første månadene i år er den totale eksportverdien frå havbrukssektoren for første gong på 100 milliardar kroner, seier Chramer.