Prisfall svir for Salmon Evolution

I tillegg til eit prisfall frå 99 til 67,80 kroner kiloen i gjennomsnitt samanlikna med dei ni første månadane i 2024, har Salmon Evolution også auka kostnadar. 

Hittil i år har det kosta 80,30 kroner å produsere ein kilo laks i det landbaserte oppdrettsanlegget til Salmon Evolution i Indre Harøy. I same periode i fjor kosta det 66,20 kroner. 

Konsekvensen av prisfall og kostnadsauke er tresifra millionunderskot per 3.kvartal (sjå tabell under).

Ventar prisauke
I september i år steig prisen i spotmarknaden, der laks blir handla frå dag til dag, til 72,74 kroner kiloen. I oktober var prisen 74,58 kroner kiloen ifølgje laksebørsen Fish Pool.

I kvartalsrapporten for 3. kvartal skriv Salmon Evolution at selskapet ventar høgare prisar neste år og framover. Det er ei forventning som også kjem fram i Fish Pool sin statistikk over prisen på kontrakter for levering fram i tid.

Testar byggesteg to
Innan 30 dagar vil Salmon Evolution starte testing av andre byggesteg i anlegget. Første utsett av smolt i byggesteg to skal gjerast i første kvartal neste år.

Andre byggesteg vil meir enn doble produksjonskapasiteten til Salmon Evolution. I 2026 ventar selskapet å slakte 7000 tonn (sløyd og hovudkappa) laks. Det er 50 prosent meir enn i år.